Jataqhanada turatyn semeılik stýdentter jýyný úshin aqsha tóleýge májbúr
SEMEI. QazAqparat - Semeıde arnaıy qurylǵan komıssııa músheleri jataqhanalardy tekserip jatyr. Sebebi, stýdentterge arnalǵan baspanaǵa bógde turǵyndardyń ornalasýy jıilep ketken,dep habarlaıdy QazAqparat.
Búginde Semeıde 20-dan asa kolledj, 4 ýnıversıtet bar. Munda 30 myń stýdent bilim alyp jatyr. Biraq jataqhanamen barlyq jasty qamtý múmkin bolmaı tur. Stýdentterge jataqhanadan oryn jetpeı jatqanda, ony ózge bireýlerge jalǵa beretin basshylar bar bolyp shyqty. Muny qaladaǵy jataqhanalarǵa tekserý júrgizgen memlekettik qyzmet isteri jáne sybaılas jemqorlyqqa qarsy is-qımyl agenttigi men arnaıy qurylǵan qoǵamdyq monıtorıngtik top músheleri anyqtady.
Kezekti tekseris kezinde de taǵy birqatar máselelerdiń beti ashyldy. Qaladaǵy jekemenshik jataqhanada turatyn stýdentter úshin tolyq jaǵdaı jasalmaǵan. Munda as bólmesi men azyq-túlikti saqtaıtyn tońazytqysh ta joq. Tipti stýdentter jýynatyn bólmede sýǵa bir ret túskeni úshin 150 teńge tóleıtin bolyp shyqty.
Sonymen qatar stýdentter 16 myń teńge shákirtaqysynyń 14 myńyn jataqhanaǵa tóleıdi. Negizinde jataqhana úshin tólemaqy shákirtaqynyń 25 paıyzynan aspaýy tıis.
«Búginde qaladaǵy barlyq oqý oryndarynyń ózderine tıesili jataqhanasy joq. Sondyqtan bilim ordasy basqa jataqhanasy bar oqý orynymen kelisip, stýdentterin ornalastyrady. Biraq jataqhanalardyń jaǵdaıy kóńilimizge qonbaıdy. Aı saıynǵy tólemaqysy qymbat. Stýdentterdiń bos ýaqytynda demalatyn, sabaqqa daıyndalatyn, tipti as daıyndatyn bólmesi joq. Endi osy máselelerdi sheshýge yqpal etemiz», - dedi monıtorıngtik top múshesi Nıkolaı Isaev.
