Jataqhana tapshylyǵy máselesi qalaı sheshiledi – Ǵylym mınıstri
«Jataqhana máselesi rasynda bar, bul bir kún emes, bir jyl emes, ondaǵan jyldar boıy qordalanǵan másele. Ásirese Almaty qalasynda óte ózekti bolyp otyr, sebebi onda 36 joǵary oqý orny bar, elimizdiń barlyq stýdentteriniń úshten biri Almatyda, olardyń 70%-y basqa qalalardan kelgender. Biz qazir Almaty qalasy boıynsha úlken is-sharalar keshenin júrgizip jatyrmyz, jataqhanalar qurylysyna jeke kapıtaldy tartý, akademııalyq ınfraqurylymdy keńeıtý úshin ınvestorlarmen kezdestik. Almatyda jeke shtab quryldy, qıyn jaǵdaıǵa tap bolǵan stýdentterdi ýaqytsha ornalastyramyz, olarǵa baspana izdeımiz», - dep jaýap berdi mınıstr Ortalyq kommýnıkatsııalar qyzmetinde jýrnalıstiń suraǵyna.
Mınıstrdiń aıtýynsha, qazirgi ýaqytta qıyn jaǵdaıǵa tap bolǵan 130 stýdentke kómek kórsetildi.
«Máseleni tolyq sheshý úshin bólek júıeli sharalar qajet. Sondyqtan Joldaýda berilgen tapsyrmalarǵa sáıkes, kelesi jyldan bastap ýnıversıtetterge qatań talaptar qoıamyz. Eger ýnıversıtet jańa mamandyq ashqysy kelse, osy jańa mamandyq boıynsha stýdentterdi tartqysy kelse nemese jańa ýnıversıtet ashylsa, jataqhanalarmen 100% qamtamasyz etý jóninde qatań talap qoıylady. Aıtalyq, JOO jańa mamandyqqa 100 stýdentti tartqysy kelse, 100 tósek-orynmen qamtamasyz etýi qajet.
Ári qaraı jataqhana máselesi qalany damytý aıasynda qolǵa alynbaq, ony ákimdikten naqtylaý qajet. Shynynda da, Súleımen Demırel sekildi birneshe jekemenshik ýnıversıtet ózderiniń kampýstaryn qala syrtyna shyǵaryp jatyr, jańadan qurylǵan Jetisý oblysynda da Almatydan talapkerlerdiń bir bóligin tartý úshin ýnıversıtet ınfraqurylymyn damytý boıynsha úlken baǵdarlama josparlanýda», - dedi Saıasat Nurbek.
Buǵan deıin Ǵylym jáne joǵary bilim mınıstri óz balalarynyń qaıda bilim alyp jatqany týraly jýrnalıster suraǵyna jaýap bergen edi.
Sonymen birge, 2500 qazaqstandyq stýdent Reseı men Ýkraınadan otandyq JOO-larǵa aýysqan.
