Jataqhana máselesin sheshý úshin Astanada 10 jer ýchaskesi belgilendi

ASTANA. QazAqparat - Jataqhana máselesin sheshý úshin Astanada jalpy aýmaǵy 10,4 ga bolatyn 10 jer ýchaskesi belgilendi. Bul týraly Elordany odan ary damytý taqyrybyna arnalǵan májiliste Astana qalasynyń ákimi Áset Isekeshev málim etti, dep habarlaıdy «QazAqparat» HAA tilshisi.

«Bes áleýmettik bastamanyń» biri bolyp tabylatyn jataqhana máselesin sheshý erekshe baqylaýda. Qazirgi tańda tórt Joǵarǵy oqý orny boıynsha (L.Gýmılev atyndaǵy EUÝ, S.Seıfýllın atyndaǵy Qazaq agrotehnıkalyq ýnıversıtet, Astana qalasynyń Medıtsınalyq ýnıversıteti, Qazaq ulttyq óner ýnıversıteti) jataqhanalarda 9750 orynnyń qajet ekeni eseptelip otyr», - dedi ákim.

Qala basshysynyń aıtýynsha, osy maqsatta (jataqhana qurylysy úshin) jalpy aýmaǵy 10,4 ga bolatyn 10 jer telimi belgilengen.

«Balama retinde sonymen qatar, naryqtyq mehanızmderdi usynamyz. Naqtyraq aıtqanda, bizdiń qalada 35 kolledjde 26 myń stýdent oqıdy. Olardyń 1800-i jataqhanamen qamtylǵan (11 jeke, 9 memlekettik). Áli de 2100 orynǵa qajettilik bar. Qazirgi ýaqytta jalpy qory 9 myń tósek oryn bolatyn qalada 100 «juldyzsyz» otel bar. Olar memlekettik-jekemenshiktik seriktestigi aıasynda stýdentterge qyzmet ete alady. Bul bizdiń ýaqyt pen aqshany únemdeıdi. Osyǵan baılanysty usynysty QR Bilim jáne ǵylym mınıstrligine daıyndap jatyrmyz», - dedi Áset Isekeshev.