Jataqhana máselesin 100% sheshý úshin jekemenshik sektormen jumys isteýimiz kerek - mınıstr
«Biz jataqhanadaǵy oryn tapshylyǵyn sheshý úshin birneshe sharalardy qabyldadyq. Birinshiden, joǵary oqý orny bos turǵan nemese tolyq bolmaǵan hostel, qonaq úılermen kelisimshart jasady. Olardan 10 aılyq, ıaǵnı uzaq merzimge tólemaqylary bir deńgeıde kelisilgen kelisimsharttar arqyly birneshe myń tósek oryndy aldyq. Ekinshiden, Indýstrııa jáne ınfroqurylymdyq damý, Densaýlyq saqtaý mınıstrligimen kelisip, qazir stýdentter turyp jatqan jataqhanalardyń sanıtarlyq normalaryna ózgeris engizdik. Mysaly, jataqhanalardaǵy qoımalar, bos jatqan zaldardy stýdentter tura alatyndaı etip jasaqtadyq. Onyń arqasynda birneshe myń jańa oryndy shyǵaryp aldyq», - dep jaýap berdi mınıstr tilshi saýalyna.
Saıasat Nurbektiń aıtýynsha, keler jyldan bastap jataqhana salý isine jeke merdiger kompanııalar tartylady. Ol úshin qurylys kásiporyndarymen birge jasalatyn shart talaptaryna ózgeris engizilgen.
«Úshinshi ári negizgi shara bizdiń mınıstrliktiń janyndaǵy Qarjy ortalyǵy merdiger kompanııalarmen, qurylys kompanııalarymen sharttardy jańartty. Nege deseńiz, basynda kóp merdiger jataqahana qurylysyna kirmeýge nemese burynǵy sharttan bas tartýǵa tyrysatyn. Óıtkeni, onyń merzimi uzaq edi – 8 jyl. Sonymen qatar, tólemeri de joǵary emes. Bul rette 50-den astam merdiger kompanııamen kezdesýler ótkizip, sol sharttardy olardyń talaptaryna yńǵaılap, osy aıdyń basynda Úkimettiń tıisti qaýlysy qabyldandy. Kelesi jyldan bastap osy máseleni túbegeıli sheshý úshin qurylys kompanııalarymen jumys isteımiz. «Atameken» UKP da buǵan belsendi qatysty, ıaǵnı 100 paıyz bul máseleni sheshý úshin biz jekemenshik sektormen jumys isteýimiz kerek. Úkimettiń óziniń tolyq shamasy da kelmeıdi. Sonymen qatar, demografııalyq ósim jyldan-jylǵa qarqyn alyp kele jatyr», - dedi Saıasat Nurbek.
Aıta keteıik, bul ýaqytqa deıin stýdenttik jataqhana salatyn ınvestorlarǵa jeńildik jasalatynyn habarlap edik.
