Jat mádenıet yqpalyna kózsiz erýge tek dástúrli ıslam ǵana qarsy tura alady - QR Din isteri agenttiginiń tóraǵasy
ALMATY. 4 naýryz. QazAqparat - Qazirgi ýaqytta jat mádenıet yqpalyna kózsiz erýge, bóten ıdeologııanyń jeteginde ketýge tek dástúrli ıslam ǵana qarsy tura alady.
Bul týraly QR Din isteri agenttiginiń tóraǵasy Qaırat Lama Sharıf búgin Almatyda «Áıel jáne din» taqyrybynda ótip jatqan halyqaralyq forýmda aıtty.
«Búginde qoǵamnyń nazary hıdjab máselesine jıi aýdarylýda. Qazaqstandyq qoǵam úshin qaýip hıdjabtyń ózinde emes. Másele qazaqtar úshin jat mádenıet pen ıdeologııanyń enýine túrtki bolatyn, qazaqy qalpymyzdan, ulttyq mentalıtetimizden, bereke-birligimizden aıyrýǵa alǵyshart jasaıtyn dindarlyq formasynyń ózgerý qaýpinde bolyp tur», - deıdi Qaırat Lama Sharıf. Onyń aıtýynsha, ótken tarıhymyzǵa kóz júgirtetin bolsaq, qazaq halqynda áıelder kúndelikti ómirde júzin jaýyp júrmegen, ózgelerden oqshaýlanyp nemese erleriniń ruqsatynsyz basqalarmen sóılesý quqyǵynan aıyrylyp kórgen emes. Qazaqtyń baı sózdik qorynda «hıdjab» degen uǵym múlde joq. Bizdiń ata-babamyz «hıdjab» sózin áıelder kıimine qatysty qoldanbaǵan.
Ulttyń dúnıetanymy onyń dástúrimen sabaqtasyp jatady. Sondyqtan «dástúrli din» retinde urpaqtan urpaqqa jalǵasyp kele jatqan din ǵana tanylady. Qazaqstanda qazaq, ózbek, uıǵyr, tatar, túrik, kúrd, tájik, qyrǵyzdardyń barlyǵynyń ata dini - hanafı mazhabyndaǵy ıslam. Sebebi, ıslam ulttyq dástúrlermen tyǵyz astasqan. Bul oraıda ár ult óziniń ata dinin, dástúrli mazhabyn ustanǵanda ǵana tutastyǵyn, birligin saqtap qala alady.
