Jasyndaı jarqyldaǵan daraboz Bekzatty Ankaradaǵy qazaq jastary eske aldy
ANKARA. 8 sáýir. QazAqparat - Qazaq sportynyń qulageri, Sıdneı Olımpıadasynyń jeńimpazy, ulttyq maqtanyshymyz Bekzat Seıilhanuly Sattarhanov tiri bolǵanynda ústimizdegi jyldyń 4 sáýirinde óziniń 33 jasqa tolǵan týylǵan kúnin qalyń eliniń ortasynda aman-esen atap óter edi...
Jıyrma jasynda sharshy alańda qarsylastaryna ese bermeı eseńgiretip, Olımp shyńyn baǵyndyrǵan darabozdyń rýhyna taǵzym etý maqsatynda «Ankara Qazaq Jastary» birlestiginiń músheleri eske alý keshin ótkizdi. Bul týraly birlestiktiń baspasóz bóliminen Myrzahan Baıbolov habarlady, dep jazady Baq.kz.
Basqosýda alyptardy alqyndyrǵan alamanda altynnan alqa taǵynyp, kók baıraǵymyzdy bıikte jelbiretken óren júıriktiń sport áleminiń tabaldyryǵyn attaýynan bastap, Sıdneıdegi aqsarbas aıtqyzyp, aq túıeniń qarny jarylǵan, qýanyshtan kózdiń jasyn yrshytqan tarıhı sátke deıingi jeńisti joly baıyppen baıandaldy.
Kórnekti rejısser Satybaldy Tekeevtiń «BEKZAT» derekti fılminiń nazarǵa usynylýy - keleli keshtiń mańyzyn kemerinen asyrdy. Báısheshek ǵumyrly batyrdyń bylǵary qolǵapty ónerdiń sıqyryna eltigen bozbala shaǵynan ult mereıin tasytyp, óshpes dańqqa kenelgen kerneýli kezeńi men qabyrǵany qaıystyrǵan qazasyna deıingi merzim sheber sýrettelgen derekti dúnıeni tapjylmaı tamashalaǵan jastar batyr Bekzattyń ózimen júzdeskendeı ǵajaıyp bir kúı keshti.
Aıbynymyzǵa aınalǵan arda azamatymyzdyń kózin kórip, aralasý baqyty buıyrǵan zamandastary, túrkistandyq bilimgerler Jambyl Eralıev, Erlan Alashbaev pen Nurjan Abıshevter tebireniske toly estelikterin ortaǵa saldy. Dinmuhammed Ámetbek bolsa, Seken Turysbekovtyń «Kóńil tolqynyn» naqyshyna keltire shertip, kóńil pernelerin dóp basty.
Marqumnyń rýhyna quran baǵyshtaýmen qorytyndylanǵan taǵylymdy keshten soń saıypqyran sańlaqtyń kúrdeli bolmysy aıqyndala, eresen erligine qapysyz qurmet eselene tústi.
