Jasyna baılanysty memlekettik áleýmettik járdemaqylar qysqartylady - QR DSÁDM

ASTANA. QazAqparat - 2017 jyldyń 1 shildesinen bastap jasyna baılanysty memlekettik áleýmettik járdemaqylar taǵaıyndaý qysqartylady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobasyn tanystyrǵan Densaýlyq saqtaý jáne áleýmettik damý vıtse-mınıstri Svetlana Jaqypova málim etti.

«Zeınetaqymen qamsyzdandyrý úshin bazalyq zeınetaqyny jetildirý sheńberinde 2017 jyldyń 1 shildesinen bastap bulaısha taǵaıyndaý tártibi ózgeredi. Bul rette jasyna baılanysty beriletin memlekettik áleýmettik járdemaqylar qysqartylady. Búgingi kúni onyń mólsheri bazalyq zeınetaqy mólsherine teń», - deıdi S.Jaqypova.

Onyń aıtýynsha, bazalyq zeınetaqy azamattarǵa jalpy belgilengen zeınetaqy jasyna (áıelder úshin 58-63 jas, erler úshin - 63 jas) jetken kezde ǵana, zeınetaqy ótiline baılanysty taǵaıyndalatyn bolady.

Túıindeı aıtsaq, 2017 jylǵy 1 shildege deıin zeınetkerlikke shyqqan zeınetkerler úshin zeınetaqy júıesine qatysý ótiline baılanysty bazalyq zeınetaqyǵa birjolǵy qaıta esepteý júrgiziletin bolady. Al odan keıin zeınetaqy júıesine qatysý ótili 10 jyl bolǵan jaǵdaıda, bazalyq zeınetaqynyń mólsheri eń tómengi kúnkóris deńgeıiniń 50 paıyzyn quraıtyn bolady.

«10 jyldan artyq árbir jyl úshin onyń mólsheri 2 paıyzǵa arttyrylyp otyrady. Qatysý ótili 35 jáne odan kóp bolǵan jaǵdaıda eń tómengi kúnkóris deńgeıiniń 100 paıyzyna teń bolady. Zeınetaqy júıesine qatysý ótili 10 jyldan kem zeınetkerler úshin tólemniń mólsheri bazalyq zeınetaqynyń qazirgi mólsherinen tómen bolmaıdy», - dedi vıtse-mınıstr.