«Jasyl» energetıka úlesin 2017 jylǵa qaraı 3 paıyzǵa jetkizý kózdeledi - N. Qapparov
ASTANA. 8 mamyr. QazAqparat - 2014 jyly elimizdiń energetıkalyq teńgeriminde «jasyl» energetıka úlesin 1 paıyzǵa, al 2017 jylǵa qaraı 3 paıyzǵa jetkizý kózdeledi.
Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Qorshaǵan ortany qorǵaý mınıstri Nurlan Qapparovtyń aıtýynsha, qazirgi tańda mınıstrlik Qazaqstan Respýblıkasynyń «jasyl» ekonomıkaǵa kóshý tujyrymdamasyn ázirlegen. Bul tujyrymdamaǵa sáıkes, elimizdiń energetıkalyq teńgeriminde «jasyl» energetıka úlesin 2014 jyly 1 paıyzǵa, al 2017 jylǵa qaraı 3 paıyzǵa jetkizý kózdeledi. Budan bólek, uzaq merzimdi perspektıvada jańartylatyn energııa kózderiniń tehnologııalary arzandaıdy jáne odan ári damı túsetin bolady.
«Osynyń ózi qýat óndirýdiń balamaly kózderin keń kólemde qoldanylyp, 2030 jylǵa qaraı jalpy energııa tutyný kóleminde jańartylatyn energııa kózderiniń úlesin 10 paıyzǵa jetkizýge múmkindik beredi. Al orta merzimdegi maqsat jeke tutynýshylardyń jańartylatyn energııa kózderiniń jobalaryn júzege asyrýdy qoldaý jáne iri «jasyl» jobalardy Qazaqstannyń energetıka júıesine yqpaldastyrý bolyp tabylady», - deıdi N. Qapparov.
