«Jasyl el» eńbek jasaqtary «ǵasyr jobasyna» qatysady

«Batys Eýropa - Batys Qytaı» halyqaralyq tranzıt dálizin qaıta salý jobasy jol ótetin óńirlerde ǵana emes, búkil respýblıka kóleminde úlken qyzyǵýshylyq týdyryp otyr. Jobany júzege asyrylýy bastalǵaly qurylys jumystaryna 34 myń adam tartylǵan bolatyn. Endi «ǵasyr qurylysyn» iske asyrýǵa «Jasyl el» jastar eńbek jasaqtary da qatysatyn boldy. Bul ótken aıda qol qoıylǵan «Jasyl el» jastar eńbek jasaqtarynyń respýblıkalyq shtaby» jekemenshik mekemesi men Qazaqstan Respýblıkasy Kólik jáne kommýnıkatsııa mınıstrliginiń Avtomobıl joldary komıteti arasyndaǵy ózara túsinistik týraly memorandýmda bekitilgen.

Dálirek aıtqanda, bıyl stýdentterdiń jazǵy demalysy kezinde qurylys jumystaryna 400-deı jastar tartylady. Osyǵan oraı, qazirgi tańda qurylys jumystary júrip jatqan 4 oblystaǵy Avtomobıl joldary komıtetiniń oblystyq departamentterine «Jasyl el» músheleriniń jumysyn uıymdastyrý jóninde tapsyrmalar berildi.