«Jasyl» ekonomıkaǵa jol ashyq» - baspasózge sholý
***
«Egemen Qazaqstan» gazetinde «Eldik merekeler - Elbasy eńbeginiń eren kórinisi» degen taqyryppen Qazaqstan Respýblıkasynyń Memlekettik hatshysy Gúlshara Ábdiqalyqovamen aradaǵy suhbat berilgen. «Bıylǵy jyl elimiz úshin mereıli belester men merekeli toılardyń toǵysqan kezeńine aınalǵaly otyr. Eldiktiń osynaý torqaly toılaryn el bolyp abyroımen ótkizip, Elbasy N.Á.Nazarbaevtyń kemel saıasatynyń arqasynda shyrqaý bıikke órlegen Qazaq eliniń tatýlyqtyń naǵyz talbesigi, turaqtylyqtyń berik tuǵyry ekenin álemge dáleldeý bárimizge syn men mindet.
Elbasynyń uıǵarymyna oraı, bıylǵy Qazaqstan halqy Assambleıasynyń jylyn, Qazaqstan Konstıtýtsııasynyń 20 jyldyǵyn, Qazaq handyǵynyń 550 jyldyǵyn jáne Uly Jeńistiń 70 jyldyǵyn merekeleýdi ózara úılesimdi baılanysta júzege asyrýdy usynyp otyrmyz. Óıtkeni, atalǵan aıtýly datalardyń barlyǵy bizdi búgingideı derbestikke jetýge jetelegen, yqpal etken, dara jol ashqan ultymyzdyń ár kezeńindegi, ár belesindegi taǵylymdy tarıhy, ortaq shejiresi. Sondyqtan, bul qasıetti belesterdi bóle-jara qasterlep, derbes atap ótýimizge eshqandaı negiz joq», - deıdi Memlekettik hatshy.
Bas bysylymda «Alaıaqtyq» atty maqala basyldy. «Budan burynyraqta Aqtóbede qoljetimdi páter áperemin dep ańqaýlardyń aýzyn ańqaıtyp ketip, qarjysyn oljalap, bermeı ketkender ustalyp, jazasyn alǵan-dy. Endi ákki qýlar alaıaqtyqtyń «formatyn» jetildire bastapty. Aqtóbe qalasynda túrli sebeptermen turǵyndardyń senimine kirip, aldaý jolymen ózgelerdiń tıesili zattaryn ıemdenip ketý taǵy da beleń ala bastady. Jańa jyl bastalǵaly ǵana qala aýmaǵynda osyndaı alaıaqtyqtyń 4 deregi tirkelip, abyroı bolǵanda bul qylmystardyń barlyǵy da ashyldy. Taıaýda kezekshi bólimge 46 jastaǵy qala turǵyny shaǵymdanyp, 2013 jylǵy 4 qyrkúıekte 36 jastaǵy beıtanys áıel ulyn emdeý úshin aldaý jolymen 450 myń teńgesin alyp ketkenin habarlaǵan. Adam basyna túsken aýyrtpalyqty bas paıdasyna jaratýǵa bel býǵan alaıaq áıel uzaqqa barmady, kúdiktini krımınaldyq polıtsııa basqarmasynyń qyzmetkerleri qolǵa túsirdi. Ulynyń saýyǵýy úshin janyn berýge bar ananyń álsiz býynynan ustaǵan alaıaq áıeldiń obal-saýapty umytqan jan ekeni aıtpasa da túsinikti», - dep jazady maqala avtory.
«Egemen Qazaqstan» gazetinde «Jasyl» ekonomıkaǵa jol ashyq» atty maqala jarııalandy. Keshe Ortalyq kommýnıkatsııalar qyzmetinde «Jasyl» ekonomıka úshin jáne G-Global-dy damytý koalıtsııasy» ZTB atqarýshy dırektory Ashat Súleımenov brıfıng ótkizdi. Onda koalıtsııanyń atqaryp jatqan jumystary sóz boldy.
Spıkerdiń sózine qaraǵanda, bıylǵy jyly Astanaǵa irgeles Arshaly aýdanyna qarasty Arnasaı aýylynda «Arnasaı - jasyl alqap» jobasy júzege asyrylady eken. Atalǵan alqapta elimizdegi eń úzdik ári tıimdi, oǵan qosa qoljetimdi jasyl tehnologııalar shoǵyrlandyrylyp, jınaqtalatyn kórinedi. «Búginde jasyl tehnologııalar shaǵyn jáne orta bıznestiń básekege qabilettiligin arttyrýǵa múmkindik beredi. Sondaı-aq, elimizde Birikken Ulttar Uıymynyń Damý baǵdarlamasy birneshe jyldan beri jumys istep keledi. Osy kúnge deıin olar Mańǵystaý, Qyzylorda, Shyǵys Qazaqstan, Aqmola oblystarynda áleýmettik nysandarda birtalaı jasyl jobalardy júzege asyrdy», dedi A.Súleımenov.
Koalıtsııa dırektorynyń sózine qaraǵanda, endi osynaý ozyq jobalardy birtindep bızneske endirý jumystary júrgizilip jatyr. «Osy suraqtar tóńireginde jaqynda Birikken Ulttar Uıymynyń Damý baǵdarlamasynyń basshylarymen kezdestik. Sóıtip, elordadan 35 shaqyrym jerde Arnasaı demoalańyn qurýǵa kelistik. Osy jerde jasyl tehnologııalardyń eń úzdikteri jınaqtalady dep kútilýde», - dep sózin jalǵady ol.
***
«Vremıa» gazetiniń jazýynsha, Astanada para aldy dep aıyptalyp otyrǵan Tabıǵı monopolııalardy retteý agenttiginiń burynǵy basshysy Murat Ospanovqa qatysty qylmystyq is boıynsha sot jalǵasýda. Basylym málimetine qaraǵanda, keshe kýágerler 200 myń dollar qaıdan paıda bolǵanyn jáne aıypker bul qarjyny qandaı maqsatqa jumsaǵysy kelgendi jaıynda aıtyp berdi. Ol qyzynyń turmysqa shyǵýyna baılanysty atalǵan qarjydan uzatý toıyn jasamaqshy bolǵan. Sot otyrysynda kóterilgen derekter jaıynda " Pyshnye provody - gorkıe slezy" atty maqalada tolyq berilgen. Aıta keteıik, M. Ospanov isine qatysty sot protsesi ótken jyldyń 11 qarashasynan jalǵasyp keledi.
***
«Ekspress-K» basylymynyń sońǵy sanynda «Kıborgı nastýpaıýt» degen maqala jarııalandy. Óskemende kıbersporttan týrnır ótken kórinedi. Bes kúnge jalǵasqan jarysta klavıatýralar kómegimen Óskemen men Semeıdiń birneshe komandalary saıysqa tústi. Qatysýshylardyń sózine qaraǵanda, búginde kıbersport kompıýterlik oıyn ǵana emes, sonymen qatar kóptegen damyǵan elderde moıyndalǵan sporttyń túri. Aıta keteıik, qazirgi kezde kıbersportqa moıyn burǵan jastardyń sany artyp keledi.
