«Jasyl» ekonomıka ulttyq mádenıettiń bólshegine aınalýy tıis – Áset Isekeshev
NUR-SULTAN. QazAqparat – «Jasyl» ekonomıka ulttyq mádenıettiń bólshegine aınalýy tıis. Bul týraly elordada ótip jatqan Jańartylatyn energııa kózderi jónindegi ІІІ sammıtte QR Tuńǵysh Prezıdenti – Elbasy qorynyń atqarýshy dırektory Áset Isekeshev aıtty, dep habarlaıdy QazAqparat tilshisi.
«Adamdardyń kópshiliginde jasyl ekonomıka túsinigi – bul kún jáne jel elektr stansasy. Degenmen, bul olaı emes. Jasyl ekonomıka – bul damýdyń basqa satysy, basqa ómir salty. Bul – jasyl ekologııalyq kólik, sý, jylý, elektr energııasyn paıdalaýdy durystap únemdeý, qurylysta jańa ádister engizý, qoqysty kádege jaratý úshin jınaýǵa durys qaraý, qalalarda, saıabaqtar men gúlzarlarda jasyl atmosfere qalyptastyrýdyń jańa ádisteri, jasyl aýyl sharýashylyǵy. Munyń barlyǵy da eń aldymen bizdiń tabıǵatymyz ben ekologııamyzǵa zor áserin tıgizedi, odan keıin naqty resrýstarmen qatar qarjylyq resrýstardy da barynsha únemdeıdi», - dedi Áset Isekeshev.
Onyń atap ótýinshe, elimizdiń birqatar óńirlerinde mundaı júıeli jobalar júzege asyryla bastaǵan. Qazirdiń ózinde olar qarjy únemdeýge septigin tıgizip otyr. Máselen, elordada jańa energııa únemdi materıaldardy, qurylysty jobalaý barysynda modeldeýdiń aqparattyq júıesin qoldaný arqyly turǵyn úı salýdyń jańa ádisteri qurylys salasyna engizý boıynsha joba qolǵa alynǵan.
«Klımaty sýyq óńirlerimiz úshin bul óte mańyzdy. Sebebi kúrdeli nysandardy bir qurylys maýsymynda salyp shyǵýǵa múmindik beredi. Bul qomaqty qarajat. Sonymen qatar qurylys barysynda ǵana emes ǵımaratty basqarý da munyń mańyzy joǵary. Máselen, Ulybrıtanııada engizilgen bul prıntsıp energııa tutynýdy 25 paıyzǵa, sýdy 30 paıyzǵa, mundaı ǵımaratty kútip ustaý shyǵyndaryn 30 paıyzǵa qysqartýǵa múmkindik bergen. Osydan-aq qansha qarajat únemdeýge bolatyndyǵyn oılańyzdar», - dedi qor basshysy.
Sonymen qatar ol elordada 2018 jyldan bastap qatty turmystyq qaldyqtardy suryptap jınaý boıynsha joba qolǵa alynǵanyn, jınalǵan qoqysty kádege jaratatyn kásiporynnyń iske qosylǵanyn aıtty.
«Eń aldymen balalar men jastarda «jasyl» mentalıtet, oılaý mádenıetin qalyptastyrý óte mańyzdy. Munymen maqsatty túrde aınalysý qajet jáne bul ulttyq mádenıettiń bóligine aınalýy tıis», - dedi Áset Isekeshev.
