«Jasyl» dáliz qoldanylatyn syrtqy ekonomıkalyq qyzmetke qatysýshylar tizimi keńeıtildi
ASTANA. QazAqparat - Aǵymdaǵy jyldyń naýryzynan bastap «jasyl» dáliz qoldanylatyn syrtqy ekonomıkalyq qyzmetke qatysýshylar tizimi keńeıtildi. Bul týraly búgin brıfıngte QR Qarjy mınıstrligi Memlekettik kiris komıtetiniń basqarma basshysy Eldar Mamlın málim etti.
Onyń aıtýynsha, táýekelderdi basqarý júıesi aıasynda kedendik baqylaý formasyn qoldanýdy saralandyrý múmkindigi qarastyrylady.
«Táýekelderdi basqarý júıesiniń álemdik tájirıbede keńinen taralǵan tetikteriniń biri syrtqy ekonomıkalyq qyzmetke qatysýshylardy sanattarǵa bólý bolyp tabylady. Burnaǵy jyldary «jasyl» dáliz qaǵıdattary «Ókiletti ekonomıkalyq operatorlar», «Іri taýar óndirýshiler» sekildi syrtqy ekonomıkalyq qyzmetke qatysýshy sanattaryna ǵana qoldanylatyn edi. Aǵymdaǵy jyldyń naýryz aıynan bastap kedendik rásimdeý barysynda «jasyl» dáliz qoldanylatyn tizim adal salyq tóleýshilerge qatysty qaıta qaraldy. Osyǵan oraı, búgingi tańda bul sanattaǵylar tizimi keńeıdi, onyń ishinde ol tizimge monıtorıngte turǵan iri salyq tóleýshiler enip otyr», - dedi E. Mamlın.
Onyń aıtýynsha, atalǵan shara kedendik baqylaý barysyndaǵy táýekelderdi baǵalaý boıynsha jahandyq mindetterdi júzege asyrýdyń birinshi kezeń bolyp otyr.
