«Jasyl beldeýdegi» jasyl kóshetterdi qazyp alǵany úshin aıyppul tóleıtin boldy
ASTANA. QazAqparat - Aqmola oblysynyń turǵyny «Astana Ormany» aýmaǵynan jelekterdi zańsyz qazyp alǵany úshin 31 815 teńge mólsherinde aıyppul tóleıdi.
25 shildede Astana qalasynyń ІІD Jergilikti polıtsııa qyzmetiniń tabıǵat qorǵaý polıtsııasynyń ınspektoryna «Astana Ormany» aýmaǵynan jelekterdi zańsyz qazyp alý faktileri týraly qońyraý kelip túsken. Polıtseıler Aqmola oblysynyń 36 jasar A. degen azamatyn ustady, kúdikti «jasyl beldeýde» Kókshetaý tasjolynyń boıyndaǵy «Chınar» dámhanasynyń janynan 12 qaıyń aǵashyn qazyp alyp, olardy úıiniń janyna ekpek bolǵan. Zań buzýshy QR ÁQBK 386-baby «Jasyl jelekterdi kútip ustaý men qorǵaý erejelerin buzý» boıynsha jaýapkershilikke tartylyp, 31 815 teńge mólsherinde aıyppul tóleıdi. Tabıǵat qorǵaý polıtsııasynyń qyzmetkerleri kúdiktini jelekterdi qaıta oryndaryna otyrǵyzýǵa mindettedi.
Jalpy, jyl basynan beri jasyl jelekterdi kútip ustaý men qorǵaý erejelerin buzý boıynsha 537 zańdy jáne jeke tulǵa jalpy, 1 654 380 teńge somaǵa ákimshilik jaýapkershilikke tartyldy, dep habarlaıdy astana.kz.
