Jasyl beldeý elordany kórkeıte bermek
ASTANA. QazAqparat - Elimizdiń bas qalasynyń «jasyl beldeýi» 14 myń 800 gektar aýmaqqa jaıylyp jatyr. Al aldaǵy 10 jylda taǵy da 6 myń gektarǵa artpaq. Jalpy bar aǵashtyń 50 paıyzdan astamy - qylqan japyraqty, qalǵany - emen men jıde. Munda flora men faýna qatar damyǵan.
Máselen, 6 jylda Astana irgesindegi ormanǵa 7 myńnan astam qus jiberilgen. Bul óz kezeginde aǵashtardyń zııankesterden arylýyna septigin tıgizse, mol jasyl jelek jıektegi megapolısti ottegimen qamtyp otyr. Búgin osy «jasyl beldeýdi» jyldaǵy dástúrmen Elbasy kórip qaıtty. Aldymen ormandy aralap, odan soń aǵash túrlerin kóbeıtýdiń negizgi úsh baǵytymen tanysty.
Elbasy N.Nazarbaevtyń tóraǵalyǵymen Astananyń jasyl beldeýin - elordany qorshap jatqan orman alqabyn damytý máseleleri jónindegi keńes ótti. Qazaqstan Prezıdenti orman alqabynyń aýmaǵyn tikushaqpen aralap kórip, «Balqaraǵaı» demalys aımaǵynda ornalasqan etnoaýylda boldy, sondaı-aq «jasyl aımaqty» damytý úshin atqarylyp jatqan jumystardyń barysy men ony odan ári kógaldandyrý josparlary týraly habardar boldy.
Keńeste Aýyl sharýashylyǵy vıtse-mınıstri E.Nysanbaev esep berdi. Vıtse-mınıstrdiń málimetine sáıkes, búginde 1997 jyldan bastap otyrǵyzylǵan orman alqabynyń kólemi 80 myńǵa jýyq gektarǵa jetken, jas aǵash kóshetterine únemi baqylaý jasalyp, kásibı mamandardyń qatysýymen ǵylymı zertteý jumystary júrgiziledi. Keńeske Prezıdent Ákimshiliginiń Basshysy Á.Jaqsybekov, Astana qalasynyń ákimi Á.Isekeshev, Aqmola oblysynyń ákimi M.Myrzalın, Premer-mınıstrdiń orynbasary - Aýyl sharýashylyǵy mınıstri A.Myrzahmetov qatysty.
Astana mańyndaǵy jasyl aımaq ekotýrızm men sporttyq demalysty damytýǵa ıgi yqpal etýde. Qosshy men Ilınka kentteri arasynda 23 shaqyrymdy quraıtyn velosıped joly salynǵan. Qala ákimshiligi Astana aınalasyndaǵy velosıped joly jelisin 258 shaqyrymǵa deıin uzartýdy josparlap otyr. Qazaqstan Prezıdenti búginde Astana mańyndaǵy 80 myńǵa jýyq gektar jerge aǵash otyrǵyzylǵanyn jáne 2020 jylǵa qaraı onyń aýmaǵy 100 myń gektarǵa jetetinin atap ótti.
«Jasyl beldeýde» aǵashtyń san túri ósedi. Súıeldi qaıyń, usaq japyraqty shegirshin, qaraǵaı, kóde, boz jıde, terek, tipti alma men shıege deıin bar. Bul taldar tuqymdastarynyń bir jerge beıimdelýi óte qıyn. Sondyqtan mamandar jumysty ǵylymmen ushtastyrǵan. Áýeli kóshetter zerthanalarda suryptalyp, jyldan astam ýaqyt baptalady. Keıin tamyryn jaıýǵa beıimderi dalaǵa egiledi.
N.Nazarbaev «jasyl jelektegi» jan-janýarlar men ósimdik áleminiń ártúrliligine nazar aýdaryp, aǵash egýdi kóbeıtý jónindegi josparlar týraly aıtty. Ǵalymdar men ormanshylarǵa atqarǵan jumystary úshin alǵysyn bildirip, jasyl jelekti «elimizdiń tynysy» dep atady. Sonymen birge, Qazaqstan Prezıdenti qala mańyndaǵy orman alqaby elordanyń qolaıly klımatyn qalyptastyryp, ekologııasyn jaqsartýda mańyzdy ról atqaratynyn atap ótti.
"Adamdar osy jerde qansha jyl ómir súrse, ormanymyz da sonsha ýaqyt turady. Bul - elimizdiń baılyǵy. Astanada «EKSPO - 2017» halyqaralyq kórmesi ótip jatyr. Ol «jasyl damýdyń» qaǵıdattary men ıdeıasyn ustanatyn qala retinde Astananyń ımıdjin nyǵaıtýǵa septigin tıgizedi. Elorda ishindegi saıabaqtar da belsendi túrde jaqsartylýda", - dedi N.Nazarbaev.
ıAǵnı bolashaq urpaqty, óz eliniń naǵyz patrıottaryn tárbıelep ósirýde tabıǵatty saqtaýdyń jáne týǵan jerdi qurmetteýdiń mańyzdylyǵyna erekshe toqtaldy. Elbasy elordanyń aınalasyndaǵy jasyl aımaqqa qyrǵaýyldar men elikter jiberýdiń dástúrli sharasyna qatysty. Sondaı-aq is-shara sońynda buqaralyq aqparat quraldarynyń ókilderi úshin brıfıng ótkizdi.
