Jasyl beldeý aýmaǵynda qosymsha 1,5 mln-nan astam aǵash otyrǵyzylady
ASTANA. QazAqparat - Elordany abattandyrý men kógaldandyrý syrtqy faktorlardyń atmosferaǵa jaǵymsyz áserin azaıtýǵa múmkindik beredi. 2012 jyldan beri Astanada 1323,5 ga jerge, «Ońtústik-batys bóligi» jáne «Taldykól sý jınaǵyshy» ýchaskelerinde 1 846 560 kóshet otyrǵyzyldy, dep habarlady elorda ákimdiginiń baspasóz qyzmeti.
Aǵashtar kómirqyshqyl gazyn sińiredi jáne ottegi bólip shyǵarady, 24 saǵattyń ishinde bir aǵashtan úsh adamǵa jeterlik ottegi bólinedi, al 1 ga jasyl kóshet bir saǵatta 8 l kómirqyshqyl gazyn sińirip, atmosferaǵa 30 adamnyń ómirin qoldaýǵa jeterlik ottegi mólsherin bólip shyǵarady. Aǵash qalyńdyǵy 45 m jýyq aýa qabatyn kómirqyshqyl gazynan tazartady.
Qala kósheleri men saıabaqtarda otyrǵyzylǵan jasyl kóshetter sándik-josparlaý jáne rekreatsııalyqtan basqa, óte mańyzdy qorǵanysh jáne sanıtarlyq-gıgıenalyq rol atqarady. Jergilikti jerdiń aýa raıynyń erekshelikterin eskere otyryp, elorda aýmaǵynda aýa raıy jaǵdaılary kúrt ózgergen jaǵdaıda óse alatyn aǵash egiledi. Atap aıtqanda, terek, tal, qaıyń, úıeńki, kádimgi qaraǵaı, sibir shyrshasy, shegirshin, jıde jáne t.b.
Bes jylda Astananyń jasyl beldeýiniń 56% qylqan japyraqty aǵashtar (shyrsha, qaraǵaı, sibir balqaraǵaıy) jáne 44% japyraqty aǵashtar (emen, shegirshin, jıde) otyrǵyzyldy.
Qazirgi tańda Astana qalasynyń jasyl beldeýi aýmaǵynda kóshetterdi qalpyna keltirý men ekinshi qabyldaýdaǵy orman daqyldaryn jasaý jobasynyń kezekti kezeńi ázirlendi. Jasyl beldeý aýmaǵynda qoıan, túlki, qarsaq, qur men qyrǵaýyldar mekendeıdi. 5 jyldyń ishinde 4 483 qyrǵaýyl ósirildi. Ótken jyly jasyl beldeý aýmaǵyna 4083 jabaıy ań jiberilgen. Qazirgi kezde volerde 400 qyrǵaýyl men 1500-den astam balapan bar. Qyrǵaýyldar mekendeıtin arealdyń monıtorıngi olardyń jyl saıyn jasyl beldeý aýmaǵyna taralyp, tabıǵatta belsendi kóbeıip jatqanyn kórsetti.
