«Jasyl beldeý» alqabyn ulǵaıtý jumystary jalǵasyn tappaq
ASTANA. QazAqparat - Jer-Anaǵa kórik berip, tynys alyp júrgen aýamyzdy jaqsartyp, tazartyp turatyn tirshiliktiń sáni ol jasyl jelekti orman beldeýleri ekeni barshamyzǵa aıan. Alaıda elimiz ormanǵa baı emes. Onyń basty sebebi jerimizdiń negizgi bóligi qurǵaq, jartylaı shól, shóldi aımaqtarda ornalasqandyǵy. Al orman aǵashtary negizinen ylǵaldy jerlerde qaýlap ósetini belgili. Statıstıkalyq málimetterge súıensek, respýblıka aýmaǵyndaǵy Ormandar jáne butalar alyp jatqan kólem 21,6 mln. gektar. Bul Qazaqstan jeriniń 4,2 paıyzy ǵana eken. Biraq jerimizdiń tabıǵı ereksheligi osyndaı eken dep qol qýsyryp otyra berýge taǵy bolmaıdy. Búgingideı tehnologııalardyń, ǵylymnyń damyǵan ǵasyrynda shól dalamyzdyń ózine ádisin taýyp orman aǵashtaryn otyrǵyzyp, jaınatyp qoıýǵa bolady. Máselen, Astana qalasy aýmaǵyndaǵy orman beldeýleri osynyń aıqyn dáleli. Elbasynyń bastamasymen qolǵa alynǵan bul ormandy alqaptar qazirgi tańda keń qanat jaıyp keledi.
Jýyrda Memleket basshysy osy ormannyń ósý jaǵdaıymen tanysyp, ony ári qaraı damytýǵa baılanysty birqatar naqty tapsyrmalar bergen bolatyn. Elbasy aldymen elorda aınalasyndaǵy jasyl aımaqty áýeden tikushaqpen sholyp shyǵyp, Astana qalasynyń «jasyl beldeýin» damytý jáne ormandy alqap qalyptastyrý jumystarynyń barysymen tanysty.
Budan keıin Elbasy buqaralyq aqparat quraldary ókilderi úshin baspasóz brıfıngin ótkizdi. Memleket basshysy óz sózinde 1997 jyldan beri júrgizilgen jumystardyń nátıjesinde elorda aınalasyna egilgen jasyl jelektiń aýdany búginde 70 myń gektarǵa jetkenin atap ótti. - Bir kezderi bizdiń bul josparymyzǵa kúmánmen qaraǵandar bolǵan edi. Biraq biz osy ormandy bolashaq urpaq úshin ósirip, ony Qazaqstannyń keremetine aınaldyrdyq. Sonyń arqasynda qalada shań-tozań, jel azaıdy. Ormanda arnaıy jıdek aǵashtary otyrǵyzylyp, ań-qus paıda boldy. Egilgen aǵashtar elorda turǵyndary men qonaqtarynyń demalysyna qajetti jaǵdaı týǵyzady. Munda velojoldary, kempıngteri bar demalys aımaqtaryn ornyqtyrý josparlanýda, - dep atap ótip, orman sharýashylyǵy eńbekkerlerine, ǵalymdarǵa qajyrly eńbekteri úshin rızashylyǵyn bildirdi. Aldaǵy jyldary «Jasyl beldeý» alqabyn ulǵaıtý jumystary jalǵasatynyn tappaq. Elbasy barǵan saıyn keńeıip kele jatqan Astana ormanyn biz maqtanysh etýimizge bolatynyn, 2020 jylǵa qaraı onyń kólemin 100 myń gektarǵa jetkizý mindeti qoıylyp otyrǵanyn tilge tıek etti. «Osynyń bári Qazaqstannyń bolashaǵy úshin jasalyp jatyr» dedi Nursultan Nazarbaev. Bul joly da jyldaǵy dástúr boıynsha orman alqabyna qyrǵaýyldar ushyryldy. Búginde elordanyń jasyl beldeýiniń jalpy aýmaǵy 14827 ga, onyń 11500-i - orman alqaby, ol jerde 9,6 mıllıon aǵash pen 2 mıllıonǵa jýyq tal-terekter ósip-ónýde. Bul aýmaqqa 2014-2015 jyldary 776340 kóshet otyrǵyzylsa, 2016 jyly taǵy 353560 kóshet egilmek. Mamandardyń aıtýynsha, 2017 jyldan 2030 jylǵa deıin 9820 ga jer aýmaǵyna orman aǵashtaryn otyrǵyzý kózdelip otyr. Bul jumys yqtyrmaly aýmaq tolyqtaı ormandy jerge aınalǵansha júrgiziledi eken. Budan keıingi kezekte qala aýmaǵyndaǵy bos jerlerge orman alqabyn qalyptastyrý jumystary júzege asyrylmaq. EKSPO-2017 kórmesine daıyndyq aıasynda elordanyń «jasyl beldeýin» damytý úshin rekreatsııalyq aýmaqtardy jasaý da nazardan tys qalmaıtyn bolady. Qazirgi ýaqytta 25 ga aýmaqty quraıtyn bir joba boıynsha sport kesheni, balalardyń oıyn alańdary, demalys ortalyqtary, restoran, 320 kólikke arnalǵan avtoturaq jasaý qarastyrylǵan. Al 100 ga quraıtyn taǵy bir aýmaqta at sporty keshenin ornalastyrý kózdelip otyrǵan kórinedi. Onda otbasylyq demalys ortalyǵy, akvapark, 288 oryndyq balalar lageri, jastar demalys ortalyǵy bolady. Mamandardyń sózine qaraǵanda, búginde ormandy alqaptardyń sanıtarlyq jaǵdaıy kóńilge qonymdy. Onda birneshe baǵytta ǵylymı-zertteý jumystary júrgizilýde. Kóshetterdi zertteý arqyly egilgen aǵashtardyń, tal-shilikterdiń zııankes jándikter saldarynan qanshalyqty deńgeıde zaqymdanǵany nemese jersinip qalyptasqany anyqtalady. Bul kúni Memleket basshysy Astananyń «jasyl beldeýin» damytý máselelerine arnalǵan keńes ótkizdi. Keńeske Prezıdent Ákimshiliginiń Basshysy N.Nyǵmatýlın, Astana qalasynyń ákimi Á.Jaqsybekov jáne Aýyl sharýashylyǵy vıtse-mınıstri E.Nysanbaev qatysty. Keńeske qatysýshylar byltyrdan bergi eki aralyqta istelgen jumys qorytyndylary men elordanyń jasyl beldeýin ári qaraı damytý qadamdaryn talqylady. Ol úshin 2020 jylǵa deıin negizgi úsh baǵytta jumys júrgizý josparlanǵan. Olar - qalyptasqan aımaqtardaǵy jasyl jelektiń tyǵyzdyǵyn arttyrý, qala aýmaǵyndaǵy bos jerlerge aǵash otyrǵyzý, demalys oryndaryn qalyptastyrý. Jıyn barysynda Nursultan Nazarbaev «jasyl beldeý» qalyptastyrý barysyndaǵy úılesimdi jumysty qamtamasyz etý, ǵylymı tájirıbeni qoldaný, jańa tehnologııalar engizý, qala aýmaǵy men onyń syrtyndaǵy orman alqaptaryn qosý mańyzdylyǵyna nazar aýdardy. Keńes qorytyndysy boıynsha Memleket basshysy birqatar naqty tapsyrma berdi.
Elbasy Astana qalasynda ótken «Mýz-TV 2015» syılyǵyn tapsyrýǵa arnalǵan keshke qatysty. Álemniń kóptegen elderinen jınalǵan belgili ánshiler án baıqaýynda óz ónerlerin ortaǵa saldy. Aıta ketýimiz kerek, mundaı aýqymdy shara Qazaqstanda tuńǵysh ret uıymdastyryldy. Іs-shara barysynda Memleket basshysy Nursultan Nazarbaevqa «Ómirdi órkendetýge qosqan úlesi úshin» nomınatsııasy boıynsha arnaıy syılyq tapsyryldy.
