«Jasyl» aımaqta da toı-dýman, basqosý ótkizýge bolmaıdy – Aqtóbe bas sanıtary
Aqtóbe oblysy eki táýlikten beri «jasyl» aımaqta tur.
Oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva soǵan qaramastan áli de saq bolýǵa úndedi.
«Bir táýlikte taǵy 53 jaǵdaı tirkeldi. Ótken kúnderge qaraǵanda sál ósim bar. Sonymen birge 149 oshaq baqylaýǵa alynǵan. Onda 3400-den astam adam úı karantıninde otyr. «Jasyl» aımaq kóp adamǵa senim berýi múmkin. Biraq áli de vırýs el arasynda júr. Sondyqtan barlyq saqtyq sharasyn ustanýǵa úndeımin. Áleýmettik araqashyqtyqty saqtaý, maska taǵý, antıseptık qoldaný mańyzdy. Áli de toı, ujymdyq basqosý ótkizýge bolmaıdy. «Jasyl» aımaqta da ujymdyq basqosý ótkizilmeıdi», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.
Aqtóbe oblysy boıynsha áli de 400-ge jýyq adam aýrýhanada em qabyldap jatyr. Onyń jeteýi ókpeni jasandy jeldetý apparatyna qosylǵan.
«Negizi ınfektsııalyq statsıonarda naýqastar sany azaıyp keledi. Jansaqtaý bóliminde 32 adam jatyr. Bári dárigerler baqylaýynda. Infektsııalyq statsıonar júktemesi 29,1 paıyz, reanımatsııalyq kereýet júktemesi 18,6 paıyzdy qurady», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
