«Jasyl» aımaq: Aqtóbede koronavırýspen kúres jumystary qalaı uıymdastyryldy

Ótken táýlikte Aqtóbe oblysynda 8 adamnan koronavırýs ınfektsııasy anyqtaldy. Ekeýi jótelip, dene qyzýy kóterilip, dáriger kómegine júgindi. Al ózgesinde aýrý belgisi joq. Beseýi Aqtóbe qalasynan, úsheýi Mártók aýdanynan tirkeldi.
«Oblysta koronavırýs ınfektsııasy 3623 adam juqtyrdy. Qazirgi kezde 95,2% jazylyp shyqty. Jalpy tirkelgen jaǵdaıdyń 3,5% syrttan ákelingen. Al 14,3% aýrý adammen qarym-qatynasta bolǵan. Naqtylap aıtsaq, 82,1% jergilikti jaǵdaı. Sonyń ishinde 34,2% profılaktıkalyq maqsatta tekserilgen. Qazirgi tańda úı karantınine 248 adam alynyp, olarǵa medıtsınalyq baqylaý júrgizilip jatyr», - dep habarlady Aqtóbe oblystyq sanıtarııalyq-epıdemıologııalyq baqylaý departamentiniń baspasóz qyzmeti. Resmı derek boıynsha 37 adam koronavırýs ınfektsııasynan kóz jumdy. Kóbi sozylmaly derti bar adamdar.

Naýryz aıynda shetelden kelgender tekserilip, jergilikti kásipkerler maska tigýdi bastady

Aqtóbe oblysy boıynsha koronavırýs ınfektsııasy aldymen naýryz aıynda anyqtaldy. 22-naýryz kúni Nur-Sultan qalasy arqyly aqparat tarap, jergilikti atqarýshy organ eldi sabyrǵa shaqyrdy. «Iá, indet juqtyrǵan bir adam anyqtalǵany ras. Biraq óńirdegi barlyq jaǵdaı tolyq baqylaýda. Naýqas karantınde. Turǵyndarǵa tónip turǵan qaýip joq», - dep jazdy Ǵanı Ótepbaıuly Facebook paraqshasynda.

Shetelden kelgender jappaı tekserilip, karantınge jatqyzyldy. Aralarynda Qytaıdan kelgender men Italııada demalǵan aqtóbelikter de bar. «Qytaıdan kelgen tórt adam karantınde bolyp, vırýs anyqtalmaǵan soń shyǵaryldy. Al Italııadan kelgen eki adam qazir dárigerler baqylaýynda. Ájesi men nemeresi shetelge demalýǵa barǵan eken», - dedi Aqtóbe oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.

Al aýyl kásipkerleri betperde tigip, aqtóbelik seriktestik zalalsyzdandyrý suıyqtyǵyn óndire bastady. Buǵan deıin turmystyq hımııa ónimin shyǵarǵan kompanııa dezınfektsııa ónimderiniń 4 túrin, ıaǵnı, antıseptık, hloroseptık ázirledi. Ónimder Ózbekstan, RF eksporttaý josparlandy.

Aqpan aıynda shekteý sharasy engizildi
Koronavırýstyń taralýyn aldyn alý maqsatynda 31 naýryz kúni saǵat 00:00-den bastap sanıtarlyq-epıdemııaǵa qarsy is-sharalar júzege asyryldy jáne jeke, zańdy tulǵalarǵa arnalǵan sharýashylyq jáne ózge de qyzmetke erekshe talap engizildi. Qaýlyǵa sáıkes tranzıttik kólikterdi, sondaı-aq tamaq ónimderi, dári-dármekter jáne medıtsınalyq maqsattaǵy buıymdar, Aqtóbe oblysy men Aqtóbe qalasynyń ónerkásiptik, aýylsharýashylyq kásiporyndarynyń úzilissiz jumys isteýin qamtamasyz etýge arnalǵan taýarlar men materıaldardy tasıtyn kólikterdi qospaǵanda, kólik quraldarynyń barlyq túrlerine jáne azamattarǵa Aqtóbe oblysy men Aqtóbe qalasynyń aýmaǵyna kirýge jáne shyǵýǵa tyıym salyndy.

Osy sátte Aqtóbe oblysynyń ákimi Ońdasyn Orazalın halyqty sabyrǵa shaqyryp, bul qıyndyqty birge eńserýge shaqyrdy.
«Biz mundaı náýbettiń talaıyn bastan ótkizgen halyqpyz. Osyndaı syn saǵatta el ekendigimizdi kórseteıik. Bir-birimizge demeý bolaıyq. Jasy úlken qarttarymyzdy umytpaıyq. Olar úılerinde japadan jalǵyz, nazardan tys qalyp júrmesin. Kórshi-kólem bolyp, telefonmen hal-jaǵdaı surasyp turaıyq. Qajettilikterin óteýge járdem bereıik. Kópbalaly otbasylaryn da umytpaıyq. Ómir bir orynda turmaıdy. Eń bastysy, úmitimizdi úkilep, erteńgi kúnge senimimizdi arttyraıyq. Eldigimizdi asqaqtatyp, ulttyq uıysýdyń úlgisin kórseteıik. Óıtkeni eshkim de syrttan kelip bizdiń jaǵdaıymyzdy túzetip bermeıdi. Ne jasasaq ta - ózimiz jasaımyz. Tek bereke-birlik bolsyn. Sonda ǵana qandaı qıyndyq bolsa da birge jeńip shyǵamyz», - dedi oblys ákimi Ońdasyn Orazalın.

Zalalsyzdandyrý jumysy jan-jaqty júrgizildi

Aqtóbede sýpermarkettiń aldyna alǵashqy týnnel ornatyldy. Jeke kásipker Haıdar Ilıasov aımaq basshysyna óz kúshimen jasaǵan zalalsyzdandyrý týnneliniń jumysyn kórsetti. Onyń joǵary jaǵynda suıyqtyq búrkip turdy. Kásipkerdiń aıtýynsha, osy arqyly dúkenge kelýshiler dezınfektsııalandy. Aqtóbe oblysynyń ákimi Ońdasyn Orazalın qala ákimine mundaı jabdyqtar sanyn arttyrýǵa jáne olardy barlyq sýpermarketter men qala bazarlarynyń aldyna ornatýǵa kómek kórsetýdi tapsyrdy. Málim bolǵandaı, Haıdar Ilıasov bul qurylǵyny Túrkııa ónertapqyshtarynyń tájirıbesi negizinde jasaǵan.

Sonymen birge áskerı mindettiler dezınfektsııa jumysyna kiristi. Aýmaqtyq qorǵanys brıgadasy men TJD jeke quramy zalalsyzdandyrý jumysyn júrgizdi. Aqtóbe oblysy ákiminiń qaýipsizdik jáne qorǵanys áskerı qyzmet jónindegi kómekshisi Ádilbek Kýltaevtyń aıtýynsha, QR Prezıdentiniń Jarlyǵy shyqqan kezde 300-ge jýyq erikti jergilikti áskerı komıssarıattarǵa júgingen. Birinshi kezekte densaýlyǵyna baılanysty arnaıy daıyndyqtan ótken 100 áskerı qyzmetshi irikteldi.

Karantın jáne indettiń órshýi
Aqtóbe qalasy 6 sáýir kúni karantınge jabyldy. Keıin shekteý sharasy sál jeńildedi. Ókinishtisi – mamyr-maýsym aılarynda indet qaıta órshidi. Onyń negizgi sebebi de aıtyldy. «Sál bosańsı bastaǵanda indet órship shyǵa keldi. Aýrý juqtyrǵan naýqastar sany da kúrt ósti.

Oǵan birneshe sebep bar. Birinshiden, qaýipti indetti joqqa shyǵaryp, sanıtarlyq talapty saqtamaý, ekinshiden, tótenshe jaǵdaı toqtap, karantındik rejımdi bosańsytý saldary. Úshinshiden, turǵyndar arasynda belsendi skrınıng ótkizý nátıjesi. Osynyń ishinde eń bastysy ári qaýiptisi – vırýstyń bar ekenine senbeý, saqtaný sharalaryna beıjaı qaraý.

Osyndaı túsinikte júrgender qoǵamǵa eń qaýipti adamdar dep esepteımin. Óıtkeni olar osy áreketterimen kópshilikke zııanyn tıgizýde. Ókinishke qaraı, indetke shaldyǵyp, onyń zardabyn kesh túsingender de kezdesýde. Aramyzda adam kóńiline kúdik salatyn ártúrli jalǵan aqparat taratýshylar da jeterlik.

Oıdan qurastyrylǵan oqıǵalar men jalǵan kýálik berýshiler jasaǵan aýdıo, vıdeo materıaldar kúnnen kúnge kóbeıýde. Ony uıymdastyrýshylar elimizdiń qaýipsizdigine zııan keltirýshi. Al soǵan senip, áleýmettik jelide taratýshylar sonyń qolshoqpary bolyp otyrǵandar. Bilip, bilmeı istese de olar siz ben bizdiń ómirimizge zııan keltirýshiler. Ol adamdar vırýstan da qaýipti. Oǵan tek qana osylaı baǵa berýimiz kerek. Álem bolyp osy indetpen kúresip jatqan barlyq adamzat aqymaq pa? Iıa jalǵan aqparatqa senýshi skeptıkter ǵana aqyldy ma?

Alpaýyt elderdiń basshylary osy indetke dýshar bolyp, emdelýi erikkenniń ermegi me? Álde túsiný, sený úshin ózimiz, jaqynymyz naýqastaný kerek pe?» - dedi óńir basshysy Ońdasyn Orazalın.

Aqtóbe oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva jańa qaýly shyǵardy. Barlyq medıtsınalyq uıymda (aýrýhanalar, emhanalar, stomatologııalyq, gınekologııalyq) naýqastardy josparly statsıonarlyq jáne ambýlatorııalyq emdeýge qabyldaýdy ýaqytsha toqtatty.

Koronavırýs ınfektsııasymen qatar ókpesi qabynǵan naýqastardy barlyq aýrýhana qabyldady.

Dári-dármek tapshylyǵy máselesin joıý úshin bıýdjetten 500 mıllıon teńge bólindi. «Dárihana jelisiniń aınalymyn tolyqtyrý úshin Reseıden, Úndistannan dári-dármektiń 16 túrin qosymsha satyp alý úshin 500 mln teńge bólindi. Dárihanalar dárilermen kún saıyn tolyǵyp otyr, biraq suranystyń joǵary bolýyna baılanysty tez azaıýda. Soǵan sáıkes ımporttyq dári-dármekterdi jetkizý úshin Orynbor qalasyndaǵy oblystyq dárihana qoımasymen qosymsha kelisimshartqa qol qoıyldy. Osyǵan baılanysty provızorlyq statsıonarlarǵa neǵurlym suranysqa ıe on dárilik zat jetkizilýde. Bul bizge qosymsha 20 kúndik dári-dármek qorymen qamtamasyz etýge múmkindik berdi»,- dedi oblys ákimi Ońdasyn Orazalın.

#Bizbirgemiz
Elimizde #Bizbirgemiz qaıyrymdylyq aktsııasy ótip, aqtóbelik eriktiler de dárigerler men naýqastarǵa kómek berdi. Meıramhana men dámhana ıeleri aýrýhanalarǵa úsh mezgil ystyq tamaq tasydy.

Aýdandaǵy kásipkerler naýqastardyń tez saýyǵyp ketýi úshin jas et jetkizip, qymyz taratty.

Sóıtip shilde aıynyń sońǵy onkúndiginde Aqtóbede jedel járdem shaqyrǵandar sany 4 esege azaıdy.

Oblys ortalyǵynda ornalasqan provızorlyq ortalyqtar jabyla bastady.
«Jataqhanadaǵy provızorlyq ortalyq 300 kereýetke eseptelgen. Onda 800-ge jýyq adam emdeldi. Qazir jabylady, biraq jataqhana rezervte bolady. Ottek ballony, ony berý júıesi, dári-dármek qory, kadrlary saqtaýly. Qajet bolsa bir kúnde qaıta ashylady. Endi «Darý» jeke emhanasyndaǵy ortalyq jabylýy múmkin», - dedi sol kezdegi oblystyq densaýlyq saqtaý basqarmasynyń basshysy Samat Danııarov.
Tamyz aıynda shaǵyn jáne orta bıznes óz jumysyn qaıta bastap, qyrkúıek aıynda tumaýǵa qarsy vaktsına berile bastady.

3 myńnan astam kereýet rezervte tur

Aqtóbe oblysy boıynsha «Jaısań» jáne «Álimbet» shekara beketinde karantındik statsıonar ornalasqan. Shekarany kesip ótken ár adam karantınge jatqyzylady. PTR test synamasy bar adamdardyń elge kirýine ruqsat berilgen. Oblys ákiminiń baspasóz qyzmetiniń habarlaýynsha, kereýet oryndarynyń sany 315-ten 3603-ke arttyrýǵa múmkindik bar. Dári-dármektiń eki aılyq qory jınaldy. Sonymen birge aýrýhanalar jóndeýden ótip, materıaldyq-tehnıkalyq bazasy jańardy. Aqtóbe oblystyq sanıtarlyq-epıdemıologııalyq baqylaý departamenti basshysynyń Qaýlysyna saı jańa jyldyq erteńshilikter men ujymdyq basqosýlar ótkizýge bolmaıdy. Sonymen birge demalys jáne mereke kúnderi saýda, oıyn-saýyq keshenderine birqatar shekteý jalǵasady.