Jasybaı kóliniń túbinen tapansha tabyldy
ASTANA. QazAqparat - Baıanaýyl sý aıdyndarynda tabylǵan erekshe olja týraly «Jasyl el» sý astyndaǵy jasaǵynyń komandıri Vıacheslav Monahov aıtyp berdi, dep habarlaıdy pavlodarnews.kz .
Jasybaı kóliniń túbindegi tapanshany Vıacheslavtyń ózi taýyp alǵan. Onyń aıtýynsha, qarý jaǵadan 10-12 metr qashyqtyqta jatqan. - Ottegi bar ballon bolmaǵan kezderi kóldiń jaǵalaýǵa jaqyn aýmaqtaǵy túbin zertteımiz, - deıdi ol. - Shamamen alty metr tereńdikte metall zatty kózim sholyp qaldy. Oq salatyn qoraby joq tapansha eken.
Degenmen ol sýdyń túbinde naqty qandaı jaýyngerlik pe álde oıynshyq, pnevmatıkalyq qarý jatqanyn aıta almaıdy. Metaldan jasalǵan qarý ádettegi plastmassa oıynshyqtan áldeqaıda aýyr. Olar tapanshany polıtseılerge tapsyrdy. Jastar kóldiń túbinen tipti radıatorlar alyp shyqqandaryn aıtýda. Máselen, jýyrda ǵana segiz sektsııadan turatyn shoıyn batareıa taýyp alǵan sarbazdar onyń sýdyń túbine qalaı túskenine tań qalýda. - Bul joly biz dıametri úlken jáne uzyndyǵy eki metr bolatyn qubyr taýyp aldyq. Sonymen qatar zákirge uqsaıtyn úlken shynjyr shyqty. Ókinishke oraı, onyń barlyǵyn syrtqa alyp shyǵýǵa kúshimiz jetpedi, - deıdi Vıacheslav Monahov.
Aıta keteıik, bes sarbazdan turatyn «Jasyl el» sý asty jasaǵy Baıanaýylda jazdyń sońyna deıin jumys isteıdi.
