Jasy ulǵaıǵan adamdarǵa kórsetiletin medıtsınalyq kómekti jaqsartý kerek - professor J. Abylaıuly
ALMATY. Sáýirdiń 28-i. QazAqparat / Ádilet Musahaev / - Adam jasynyń ulǵaıýy men olarda jyl ótken saıyn paıda bolatyn dertterdi anyqtap, naqty dıagnoz qoıa otyryp emdep, olardyń belsendi ómir súrýine jaǵdaı jasaı otyryp, qoǵamǵa qosatyn úlesterin paıdalaný kerek.
Bul jaıynda kardıologııa jáne ishki aýrýlar ǵylymı-zertteý ınstıtýty dırektorynyń ǵylymı jumystar jónindegi orynbasary, professor, medıtsına ǵylymynyń doktory Jangenthan Abylaıuly konferentsııa barysynda málim etti, dep habarlaıdy QazAqparat.
«Qazirgi ýaqytta adamnyń 120 jasqa deıin tolyq ómir súre alatyn múmkindigi bar ekendigi anyqtalyp otyr. Ol úshin adam óz densaýlyǵyna mán berýi kerek jáne memleket tarapynan da qamqorlyq qajet. Gerantologııa degen - adamnyń jasy ulǵaıǵan kezde belsendi ómir súrýin tekseretin ǵylym. Gerantologııa jalǵyz ǵana medıtsınadan turmaıdy, ony bıologııalyq, áleýmettik turǵydan qarastyrǵan jón. Kóp jaǵdaıda jasy ulǵaıǵan adamdar óz ortasynan shettep qalady. Mundaı kezde olarǵa áleýmettik turǵyda kómek kórsetý kerek. Odan keıin bıologııalyq saǵaty da durys istemeıdi, sony jóndeý kerek», deıdi J. Abylaıuly.
Sondaı-aq ol Qazaqstan boıynsha tek jeti gerantolog maman bar ekendigin jáne olardy daıyndaıtyn ortalyqtardyń joqtyǵyn aıtady. «Medıtsınalyq bilim beretin JOO-da osy sala boıynsha bilim beretin arnaıy bólimder ashý qajet. Sonymen qatar gerantologııalyq klınıkalar bolý kerek. Óıtkeni dúnıejúzi boıynsha egde adamdar sany kóbeıep keledi. 2020 jyly Qazaqstanda jasy ulǵaıǵan naýqas adamdardyń sany 5 mıllıonǵa jetedi dep kútilýde. Olardyń sany kóbeıgen saıyn oǵan degen kómek te ulǵaıa bastaıdy. Sol úshin gerantologtardy daıyndaýdy osy bastan qolǵa alǵanymyz jón», dep atap ótti professor.
