Jasy 65-ten asqan depýtattar Májilistiń otyrysyna qatyspaıdy
NUR-SULTAN. QazAqparat – Parlament Májilisiniń jalpy otyrysy jańa formatta ótip jatyr, dep habarlaıdy QazAqparat tilshisi.
«Búgingi jalpy otyrys birshama ózgergen formatta ótip jatyr. Bizdiń keıbir áriptesterimiz qatysyp otyrǵan joq, alaıda alańdaýdyń reti joq, olardyń barlyǵy aman-esen. Dúnıejúzilik densaýlyq saqtaý uıymynyń nusqaýyna sáıkes, jasy 65-ten asqan keıbir áriptesterimizge jalpy otyrysqa qatyspaýǵa jáne úılerinde bolýǵa keńes berdik», - dedi Májilis Tóraǵasy Nurlan Nyǵmatýlın.
Osy oraıda ol jınalǵan depýtattardyń sany jalpy otyrysty mundaı formatta ótkizýge múmkindik beretinin jetkizdi.
«Endi jalpy otyrystarǵa árbir zań jobasy boıynsha tek depýtattar men negizgi baıandamashylar qatysady. Bul óz kezeginde zalda otyrǵandardy Dúnıejúzilik densaýlyq saqtaý uıymynyń sanıtarlyq normalaryna saı ornalastyrýǵa múmkindik berdi», - dedi Nurlan Nyǵmatýlın.
Budan buryn habarlanǵandaı, Májilis jumysynyń basym bóligi basqa jumys formatyna kóshedi.
