Jasulan Qydyrbaevqa «QR Eńbek sińirgen sport sheberi» ataǵy berildi
ASTANA. QazAqparat - Almatyda jýyrda ǵana aıaqtalǵan aýyr atletıkadan Álem chempıonatynyń 94 keli salmaqta Álem chempıony atanǵan qazaqstandyq ziltemirshi Jasulan Qydyrbaevqa aýyr atletıkadan «Qazaqstan Respýblıkasynyń eńbek sińirgen sport sheberi» ataǵy berildi. Bul týraly Jasulan Qydyrbaev óziniń instagram jelisindegi paraqshasynda habarlady, dep jazady sportnews.kz.
Jasulan Qydyrbaev Álem chempıonatynda julqa kóterýde úsh múmkindiktiń ekeýin ǵana paıdalana bildi. Ol alǵash, 175 kelini baǵyndyrsa, ekinshi múmkindikte 179 kelini eńserdi. Úshinshi múmkindiginde 182 kelini kótere almady. Al, serpe kóterýde 215, 221 jáne 229 kelini baǵyndyrdy. Qos saıys nátıjesi boıynsha 408 (179-229) kelini kóterip, Álem chempıony atandy.
