Jasulan Qydyrbaev pen Almas Óteshov Polshada jattyǵýda júr
ASTANA. QazAqparat - Qazaq aýyr atletteri Jasulan Qydyrbaev pen Almas Óteshov Polsha astanasy Varshavada jattyǵý jumystaryn jasap júr.
Bul týraly qazaqstandyq BAQ ókilderine ulttyq quramanyń bas bapkeri Alekseı Nı málimdedi, dep jazady «Alaman» portaly.
Esterińizge sala keteıik, Óteshov pen Qydyrbaev Hıýstonda ótken álem chempıonatynda 94 kelige deıingi salmaqta tıisinshe kúmis jáne qola júldeger atanǵan. Odan keıin, Halyqaralyq aýyr atletıka federatsııasy bul sportshylardy «dopıng qoldandy» dep aıyptap, aldaǵy jarystarǵa qatysýǵa tyıym salǵan edi. Alaıda sportshylar jattyǵýyn úzgen joq. Federatsııa naqty sheshimdi kóktemde shyǵarýy tıis.
Al osy 94 keli salmaqta 2009 jylǵy álem chempıony, 2013 jylǵy álem chempıonatynyń qola, 2014 jylǵy álem chempıonatynyń kúmis júldegeri Vladımır Sedov jattyǵýyn qaıta bastaǵan. Sedov qazir Almaty oblysy Úshtóbe qalasynda jattyǵyp jatyr. Osyǵan deıin ol 2015 jyly Taldyqorǵanda ótken el chempıonatyna qatyspaǵan. Keıin Ilıa Ilın Sedov sporttan ketkenin jetkizgen.
Qazirgi ýaqytta aýyr atletıkadan Alekseı Nı bastaǵan Qazaqstan ulttyq quramasy Reseıdiń Sochı qalasynda Olımpıada aldyndaǵy jattyǵý jumystaryn bastap ketti. Sochı qalasyna Zýlfııa Chınshanlo, Maıa Maneza, Svetlana Podobedova, Farhad Harkı, Arlı Chonteı, Jazıra Japparqul jáne Nıjat Rahımov syndy sportshylar barǵan. Sportshylardyń taǵy bir bóligi Tekelide jattyǵýlaryn pysyqtap júr. Al Ilıa Ilınniń komandasy Varshavada jattyǵý jumystaryn bastaǵan.
