Jastaıynan «Maradona» atanyp ketken qart fýtbolshy 70 jasqa toldy

TÚRKІSTAN. QazAqparat - Saýran aýdanynyń ortalyǵyndaǵy Shornaq aýylynda «Maradona» atanyp ketken sport ardageri turady. Jastaıynan dop teýip, fýtbol oınap ósken onyń shyn esimi Ergen Naımanbaev. Sport sheberine bul ataqty oıynyna tánti bolǵan jerlesteri men jankúıerleri bergen.

Ergen Ibraıymuly - Shornaq aýylynyń týmasy. Jergilikti jerdegi mektepti bitirgen soń, Almaty qalasynda joǵary bilim aldy.

Dene shynyqtyrý pániniń muǵalimi mamandyǵyn meńgerip, týǵan jerge qaıta oraldy. Sol sáttegi bozbala bala kúngi armany fýtbolshy bolýǵa baryn saldy.

Aýyldan komanda jasaqtap, kórshiles aýdandarda oıyn kórsetti. Jeńimpaz atanyp, júldeli oryndardy ıelendi.

Eptiligin baıqaǵan jattyqtyrýshylar ózge komandalar atynan oıyn kórsetýge shaqyrdy.

«Túrkistandaǵy kásiporyndar atynan oıynǵa shyǵatynbyz. Keıin temirjoldyń «Lokomotıv» komandasynyń quramynda oınadym. Odan Qyzylordanyń «Qaısar» komandasyna aýystym. Ol jaqta 10 jylǵa jýyq eńbek ettim. Sodan týǵan jerge oralyp, balalardy sportqa baýlyp jatyrmyn»-deıdi ardager sportshy.

Búginde 70 jasqa tolǵan aqsaqal jastarmen birge áli de dop teýip turady.

Ardagerler arasyndaǵy jarystarǵa qatysady. Shákirt tárbıelep, aýyl balalaryna fýtboldyń qyr-syryn úıretedi.

«Úıirmege balalardy aýyldy aralap júrip tańdaımyn. Ebi barlaryn sportqa shaqyramyn. Balalar jattyǵýǵa úlken qulshynyspen keledi. Barshasynyń yntasy joǵary. Al, jaǵdaı bolmaǵandyqtan keıin kópshiligi bir-eki aı ótken soń sportty tastap ketedi. Sondyqtan aýyldy jerdegi sportty damytýǵa úlken jaǵdaı jasaý qajet. Ol úshin zaman talabyna saı sport zal kerek»-deıdi ol.

Ergen Ibraıymuly múgedekterge arnalǵan oblystyq «Saýran» sport klýbynda da qosymsha jattyqtyrýshylyq qyzmet atqarady. Múmkindigi shekteýli jandardy otyryp oınaıtyn voleıbolǵa baýlıdy.

«Bala kezimde dop ápermeseńder qozy kezekke shyqpaımyn dep jylaıtynmyn. Keıin anam Almatydan dop ákelip berdi. Sodan túnimen aýyl balalarymen fýtbol oınap óstik. Qazir sonyń jemisin kórip otyrmyn. Sońǵy kezde aıaǵymdy aýyrtyp alǵandyqtan, jarystarǵa qatysa almaı júrmin. Al, shákirtterim senimdi aqtap jatyr. Barshasynyń yntasy jaqsy. Jaqsy oıyn kórsetip, jeńimpaz atanyp jatyr. Biz paralımpıada chempıony ataný úshin ǵana emes, óńirdegi jigerli tulǵalardyń ómirge degen qushtarlyǵyn ashý maqsatynda eńbek etýdemiz. Sonyń ózi úlken jetistik», - deıdi Maradona aqsaqal.