Jastarymyz basymdyq beretin mejelerdiń qatarynda bilim árdaıym birinshi orynda turýy shart - Nursultan Nazarbaev
ASTANA. QazAqparat - Qazaqstan bilimge bólinetin bıýdjet shyǵystarynyń úlesi jóninen álemdegi eń aldyńǵy qatarly elderdiń sanatyna qosylyp otyr. Bul týraly "Egemen Qazaqstan" respýblıkalyq gazetinde jarııalanǵan «Bolashaqqa baǵdar: rýhanı jańǵyrý» atty maqalasynda QR Tuńǵysh Prezıdenti - Elbasy Nursultan Nazarbaev málim etti, dep habarlaıdy QazAqparat.
«Bilimdi, kózi ashyq, kókiregi oıaý bolýǵa umtylý - bizdiń qanymyzda bar qasıet. Táýelsizdik jyldarynda qyrýar jumys jasaldy. Biz on myńdaǵan jasty álemniń mańdaıaldy ýnıversıtetterinde oqytyp, daıyndadyq. Bul jumys ótken ǵasyrdyń toqsanynshy jyldarynyń basynda qolǵa alynǵan «Bolashaq» baǵdarlamasynan bastaldy. Elimizde óte joǵary deńgeıdegi birqatar ýnıversıtetter ashyldy, zııatkerlik mektepter júıesi qalyptasty. Basqa da kóptegen is tyndyryldy. Degenmen, bilimniń saltanaty jalpyǵa ortaq bolýǵa tıis. Onyń aıqyn da, bultartpas sebepteri bar. Tehnologııalyq revolıýtsııanyń betalysyna qarasaq, taıaý onjyldyq ýaqytta qazirgi kásipterdiń jartysy joıylyp ketedi», - dep jazady Elbasy.
Prezıdenttiń aıtýynsha, ekonomıkanyń kásiptik sıpaty buryn-sońdy eshbir dáýirde munshama jedel ózgermegen. Adamzat júrisi jyldam dáýirge aıaq basty.
«Bul jaǵdaıda kásibin neǵurlym qınalmaı, jeńil ózgertýge qabiletti, asa bilimdar adamdar ǵana tabysqa jetedi. Osyny bek túsingendikten, biz bilimge bólinetin bıýdjet shyǵystarynyń úlesi jóninen álemdegi eń aldyńǵy qatarly elderdiń sanatyna qosylyp otyrmyz. Tabysty bolýdyń eń irgeli, basty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatarynda bilim árdaıym birinshi orynda turýy shart. Sebebi, qundylyqtar júıesinde bilimdi bárinen bıik qoıatyn ult qana tabysqa jetedi», - dep atap ótedi N.Nazarbaev.
