Jastary jıi tóbelesetin Saǵyz aýylynda 50 beınekamera ornatylady
Saǵyz – Qyzylqoǵa aýdanyndaǵy iri aýyldyq okrýgtiń biri. Okrýgte 8 211 turǵyn bar. Munda 3 mektep, Qyzylqoǵa agrarlyq-tehnıkalyq kolledji, 2 balabaqsha, 1 dárigerlik ambýlatorııa, mádenıet úıi jumys isteıdi.
Okrýg turǵyndarymen kezdesken oblys ákimi Serik Shápkenovtiń aıtýynsha, aýyl ortasymen aǵyp ótetin Noǵaıty ózeniniń ústinen eki kópir salynady. Onyń biriniń qurylysyn maýsymda bastaý kózdelgen. Al, ekinshi kópirdiń jobalyq-smetalyq qujattamasyn jasaý josparlanǵan.
«Qazir Saǵyz aýylynda «Aýyl – el besigi» baǵdarlamasymen jańa sport kesheni salynyp jatyr. Byltyr bastalǵan qurylys jumystary aldaǵy tamyzda aıaqtalýy tıis. Alaıda, merdiger «SCS Injınırıng» JShS jumysty mezgilinen keshiktirip otyr. Qazir nysannyń qurylysy 33%-ǵa aıaqtalǵan. Sol sebepten, qurylysty tezdetýdi, al jaýapty basshylarǵa jumysty qatań qadaǵalaýdy tapsyrdym. Eger bir jarym aıdyń ishinde bul jumys tıisti nátıjesin bermese, merdiger mekememen aradaǵy kelisimshart buzylady», - dedi Serik Shápkenov.
Aýylǵa aýyz sý «Keregen-Saǵyz-Jamansor» toptyq sý qubyrynan alynady. Táýligine 2 400 tekshe metr sý aıdaıtyn munara ornatylǵan. Yldı betkeıdegi munara 700 tekshe metr sý aıdap tur. Sol sebepten, qosymsha 2 sý qoımasyn, aýylishilik jeli men bıik jerden sý munarasyn salý josparlanǵan.
«Saǵyz aýylynda qaýipsizdik pen qoǵamdyq tártipti qamtamasyz etý úshin bıyl 50 beınebaqylaý kamerasy ornatylady. Polıtsııa bólimshesiniń jańa ǵımaratyn salý josparlandy. Aýyl turǵyndarynyń ıgiligi úshin ınfraqurylymdy damytyp, áleýmettik nysandardy kóptep salýǵa kóńil bólip otyrmyz. Keler jyly «Jaıly mektep» pılottyq jobasymen 600 oryndyq mekteptiń qurylysyn bastalady», - dedi Serik Shápkenov.
Eske sala ketelik, budan buryn Atyraý oblysynda aýyl jastarynyń arasynda atys bolǵanyn, jaraqat alǵan bir adam aýrýhanada kóz jumǵanyn jazǵan edik. Keıin alqabıler osy qylmysqa qatysy 21 adamnyń qylmystyq isine sheshim shyǵardy.