Jastary belsendi eldiń erteńi jarqyn - Túımebaev
Kezdesýge respýblıkalyq «Jas Otan» jastar qanatynyń tóraǵasy D.Súndetbaev, QR Din isteri jáne azamattyq qoǵamy mınıstrliginiń din máseleleri jónindegi ǵylymı-zertteý jáne taldaý ortalyǵy dırektorynyń orynbasary Turar Ábýov, Qazaqstannyń estrada juldyzy Qaırat Nurtas, jýrnalıst, telejúrgizýshi Ashat Sadyrbaı, Garvard bıznes mektebiniń túlegi, «Bolashaq» qaýymdastyǵynyń múshesi Danat Jýmın, 22 jeńilissiz jekpe jek ótkizgen kásipqoı boksshy Janhosh Turarov, «Global Business Forum» uıymynyń dırektory Ásel Sydyqova, birqatar oblystardaǵy «Jas Otan» jastar qanatynyń tóraǵalary qatysty.
Elimizdegi jastardyń basym kópshiligi ıaǵnı, 800 myńdaı jastar turatyn Ońtústik óńirinde «Jastar Otanǵa!» saıası lageriniń ótýi oblys jastary úshin óte mańyzdy ekenin aıtqan aımaq basshysy, elimizdiń erteńi jastarǵa aǵalyq aqylyn aıtty.
«Búgin Ońtústik Qazaqstanda Qazaqstannyń barlyq aımaqtarynan elimizdiń bolashaq tirekteri, búgingi jas kóshbasshylar bas qosyp jatyrsyzdar. Onda óz aqyl-keńesterińizben bólisip, jastar saıasatyn jetildirý joldaryn talqylaıdy dep senemin. Sebebi, Sizderge halyq pen Elbasy úmit artyp otyr. Sonymen qatar, ár birińiz Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn jatqa bilýlerińiz kerek, ol barlyǵyńyz úshin uran bolýy qajet. Sondaı-aq, búgingi jastar jyltyr, jattandy jalań sózderden arylyp, shynaıy sóıleýdi úırenýi qajet. Ol úshin bilim alyp, tarıhymyzdy jatqa oqyp bilýlerińiz kerek. Sebebi, jastary belsendi eldiń erteńi jarqyn. Sondyqtan, olar qazir qoǵamdaǵy barlyq salaǵa atsalysyp, táýelsizdiktiń tuǵyrly bolýy jolynda aıanbaı eńbek etýi qajet», - dedi ákim.
Basqosýda jastar ózara pikir almasyp qana qoımaı, Qazaqstandaǵy jastardyń búgingi jaı-kúıi týraly sóz qozǵap, oblys ákimine jastardy jumyspen qamtý boıynsha birqatar usynystaryn jetkizdi.
Munan bólek, kezdesýge qatysyp otyrǵan jastar Qazaqstannyń ósip-órkendeýi jolynda aıanbaı eńbek etetinderin oǵan barsha jastardy shaqyratyndyqtaryn jetkizdi.
Kezdesýdi qorytyndylaǵan oblys ákimi búgingi taza aýada ótetin jastar basqosýynyń oblys jastaryna bereri mol mazmundy kezdesý bolatynyna senim artyp, jıynnyń sátti ótýine tilektestigin bildirdi.
Aıta keteıik, Tóle bı aýdanyndaǵy «Alma-Taý» demalys aımaǵynda ótetin kezdesýge barlyq óńirlerdegi «Jas Otan» jastar qanatynyń tóraǵalary men belsendileri, saıasattanýshy, kásipker, sportshy, ánshi jáne jastar saıasaty salasynyń ókilderi jalpy sany 120-dan astam jas qatysatyn bolady. Osy kezdesýde keleli máseleler aıtylyp, jastar saıasatyn damytýdaǵy oń pikirler men usynystar ortaǵa salynbaq.
