Jastarymyz álemniń ár túkpirinde bilim alyp, eńbek etip júr – Prezıdent
ASTANA.KAZINFORM — Brıýsselge resmı saparmen barǵan Prezıdent Qasym-Jomart Toqaev qazirgi ýaqytta Belgııada bilim alyp, jumys istep jatqan Qazaqstan azamattarymen kezdesti. Bul týraly Aqordanyń baspasóz qyzmeti habarlady.
Memleket basshysy áńgimelesý barysynda otandastarymyzdy jańa Konstıtýtsııanyń qabyldanýymen quttyqtady.
– Jalpyhalyqtyq referendýmda halqymyz biraýyzdan, birtutas qoǵam bolyp Konstıtýtsııamyzdy qoldady. Óte keremet qujat, 1 shildede kúshine enedi. Ata zańymyz halqymyzdyń temirqazyǵy bolady. Sondyqtan barshańyzdy shyn júrekten jańa Konstıtýtsııanyń qabyldanýymen quttyqtaımyn, – dedi Prezıdent.
Sonymen qatar Prezıdent shetelde bilim alyp, jumys istep júrgen otandastarymyzǵa qoldaý bildirdi.
– Elimizge sizder sııaqty bilimdi, kózi ashyq, kókiregi oıaý jastar qajet. Qaı jerge barsam da jastarǵa qoldaý bildirip júremin. Shyn máninde, bul jaı aıtyla salǵan sóz emes. Jastarǵa qoldaý kórsetý – memlekettiń uzaqmerzimdi saıasatynyń bir bóligi. Jastarymyz álemniń ár túkpirinde bilim alyp, eńbek etýde. Men Prezıdent retinde muny qoldaımyn. Sebebi qaı jerde júrseńiz de, qazaq bolyp qalasyz. Biz ozyq, damyǵan, ádiletti el bolýymyz kerek. Osyndaı eldiń negizin qalaý úshin bárimiz bir el, bir halyq bolyp atsalysýymyz kerek, – dedi Prezıdent.
Qasym-Jomart Toqaev elimizdiń jańa Negizgi zańynda bilim men ǵylymdy jáne ınnovatsııany damytý memleket qyzmetiniń strategııalyq baǵyty retinde belgilengenin aıtty. Sonymen qatar jastardy birneshe shet tilin meńgerýge shaqyrdy.
Otandastar oqý men jumystaǵy jetistikteri jóninde áńgimelep, keleshek josparlarymen bólisti. Atap aıtqanda, KU Leuven ýnıversıtetiniń 3 kýrs stýdenti Álim-Seri Mahambátáli Belgııadaǵy qazaqstandyq stýdentter qaýymdastyǵy, al Arýjan Bolatbekova Brıýsseldegi Kazakh Speaking Club qyzmeti týraly baıandady.
Kezdesý sońynda Prezıdent Belgııada turatyn stýdentter men Qazaqstan azamattaryna tabys tiledi.
Aıta ketelik Memleket basshysy Brıýsselge resmı saparmen barǵan edi.
