Jastarǵa jumys: Astanadaǵy jármeńkede 1000-nan asa bos oryn usynyldy
ASTANA. KAZINFORM — Astanada «AMANAT» partııasynyń «Jastar Rýhy» Jastar qanaty «Jastarǵa jumys» bos jumys oryndary jármeńkesin uıymdastyrdy, dep habarlaıdy elorda ákimdiginiń resmı saıty.
Іs-shara Memleket basshysy Qasym-Jomart Toqaev jarııalaǵan Jumysshy mamandyqtar jyly aıasynda qala ákimdiginiń qoldaýymen ótti.
Jármeńkege 3000-ǵa jýyq adam qatysty. 70-ten astam kásiporyn, sonyń ishinde ulttyq kompanııalar da óz vakansııalaryn, ıaǵnı 1000-nan astam bos jumys oryndaryn usyndy. Qatysýshylar qatarynda «KEGOC» AQ, «Qazaqtelekom» AQ, «DAR RAIL» JShS, «Home Credit Bank» AQ, «Integra Construction KZ» JShS, «Qazmedıa ortalyǵy» AQ, «Bogatyr Kómir» JShS, «Qazposhta» AQ, «Qazaqstan Halyq Banki» AQ, Astana Hub sııaqty iri kompanııalar bar.
Jármeńke «Bir tereze» qaǵıdaty boıynsha ótti. Qatysýshylar jumys tabýmen qatar memlekettik baǵdarlamalar boıynsha da keńes aldy. Atap aıtqanda, «Jastar praktıkasy», «Birinshi jumys orny», ıpotekalyq nesıeler, sondaı-aq NEET sanatyndaǵy jastarǵa arnalǵan JOLTAP jobasy týraly aqparattar berildi.
— Jármeńkege mektep túlekterin de shaqyrdyq. Sebebi olar osy arqyly bolashaq mamandyǵyn tańdaýda baǵyt-baǵdar alyp, mamandyǵyn durys tańdaý múmkindigine ıe bolady. Jumys berýshilermen tanysyp, qaı jerde qandaı jumys bar ekenin biledi. Jumys tájirıbesi joq, oqýyn endi bitirgen mamandarǵa da memleket tarapynan qoldaý úlken. «Jastar praktıkasy» baǵdarlamasy arqyly olarǵa jumys berýshi tarapynan emes, memleket tarapynan jalaqy tólenedi. Jalpy bıyl biz osyndaı 6 úlken jármeńke ótkizdik. Sonyń nátıjesinde elordada 500-ge jýyq adam jumysqa ornalasty, — deıdi «Eńbek mobıldiligi» ortalyǵynyń dırektory Oljas Omar.
Sonymen birge is-shara barysynda óńirlerge qonys aýdarý jáne turǵyn úı máseleleri de qaraldy. Pavlodar jáne Ulytaý oblystaryna kóshýge nıet bildirgen azamattar úshin arnaıy konsýltatsııalar uıymdastyrylyp, jumysqa ornalasý, áleýmettik qoldaý jáne turmys jaǵdaılary týraly tolyq aqparat berildi. «Otbasy bank» ókilderi jumysshy jastarǵa arnalǵan «Naýryz jumysker» baǵdarlamasy boıynsha turǵyn úı alý múmkindikterin tanystyrdy.
Sońǵy eki jylda «Jastarǵa jumys» jobasy aıasynda 1,5 myńnan astam is-shara ótkizilip, 150 myńǵa jýyq jas qamtyldy.
200-ge jýyq jármeńke uıymdastyrylyp, nátıjesinde 55 myńnan astam jas turaqty jumysqa ornalasty. Mobıldi toptar shalǵaı aýyldarǵa baryp, 150-den astam eldi mekende 55 myń adamǵa keńes berdi. Joba el Prezıdentiniń 2029 jylǵa deıin keminde 2,3 mln jasty jumyspen qamtý jónindegi strategııalyq maqsatyna sáıkes júzege asyrylýda. Mundaı jármeńkeler sońǵy úsh jylda elimizdiń 20 aımaǵynda dástúrli túrde ótkizilip keledi. Osy ýaqyt ishinde elimizde 30 myńnan astam jas turaqty jumysqa ornalasty.
Jármeńke jastar men bıznes arasyndaǵy tikeleı dıalog alańyna aınalyp, jas mamandarǵa naqty ekonomıka sektorynda óz áleýetin júzege asyrýǵa múmkindik berdi.
Osyǵan deıin Astanada Konstıtýtsııanyń 30 jyldyǵy qalaı atap ótiletini aıtyldy.