Jastarǵa júkteler mindet kóp, senim de mol – Dýlat Júsipqalıev

ORAL. QazAqparat – Memleket basshysy Qasym-Jomart Toqaev Parlament Májilisiniń otyrysynda jasaǵan málimdemesinde jastarǵa artylar senimniń mol ekenin anyq ańǵartty. Oral qalasy aqparattyq taldaý jáne jastarmen jumys jónindegi resýrstyq ortalyǵynyń basshysy Dýlat Júsipqalıev osyǵan oraı óz pikirin bildirdi, dep habarlaıdy QazAqparat tilshisi.

Onyń aıtýynsha, jastar – qashanda asqaq arman men úmit, bıik ar men ór namystyń sımvoly. Elimizdegi jas býyn ókilderi memlekettiń jańa kelbetin qalyptastyrady.

-Ókinishke qaraı, búgingi tańda Otan aldyndaǵy boryshyn óteýge barýdan jaltaratyn jastar az emes. Bul, árıne, kóńil kónshitetin másele emes. Osy oraıda Prezıdent: «Jastarymyzdyń áskerı boryshyn óteýge qalaı yntalandyrýǵa bolatynyn biz búkil qoǵam bolyp oılastyrýymyz kerek», dedi. Biz shahardaǵy 14-29 jas aralyǵyndaǵy jas býynmen jumystanatyn mekeme bolǵandyqtan, bul máseleniń oń sheshimin tabýyna atsalysamyz, - dedi D.Júsipqalıev.

Onyń sózine qaraǵanda, memleket tarapynan jastarǵa jaǵdaı jasalyp keledi. Búgingi málimdemede de «Jastar praktıkasy», «Alǵashqy jumys orny» baǵdarlamalaryna ózgerister engizilip, jastar bastamalaryn qoldaýǵa arnalǵan granttar quny ósetini aıtyldy. Az qoldaý emes. Endi soǵan saı jastar tarapynan da naqty jumys kerek.

«Shahar jastary arasynda jumyssyzdyq máselesin sheshý kún tártibinde tur. Ulttyq qundylyqtardy ulyqtaý jolynda rýhanı is-sharalar legin kóbeıtý basty nazarda. Sondaı-aq ana tilimizdiń mártebesin kóterip, abyroıyn asyrý úshin onyń qadirin qarshadaı jastarǵa jiti túsindirip, júregine jetkizý jolynda qyzmet qyla bermekshimiz», dep túıindedi sózin D.Júsipqalıev.

Eske sala keteıik, budan buryn Ádilgereı Zulharov jańa Qazaqstandy qurýǵa atsalysý - jastardyń boryshy ekenin aıtqan bolatyn.