Jastarǵa jalǵa beriletin baspana: Nur-Sultanda úı alatyndardyń tizimi jarııalandy

NUR-SULTAN. QazAqparat - Elordada 2021 jylǵa arnalǵan «Jumys isteıtin jastarǵa satyp alý quqyǵynsyz jalǵa beriletin baspana» turǵyn úı baǵdarlamasynyń nátıjesi jarııalandy. Baǵdarlama boıynsha ótkenderdiń arasynda eki kóppáterli turǵyn úıde ornalasqan 800 páter bólinedi, dep habarlaıdy QazAqparat ákimdiktiń resmı saıtyna silteme jasap.

Bıyl «Jumys isteıtin jastarǵa satyp alý quqyǵynsyz jalǵa beriletin turǵyn úı» baǵdarlamasyna qatysýǵa 4863 adam ótinim tústi, onyń 800-i jaqyn arada páter kiltin alady.

Nur-Sultanda baǵdarlama boıynsha ótkenderdiń tizimi zhilfond.kz saıtynda jarııalanǵan.

Úsh tizim jasaldy:

- Іrikteýden ótken (eń tómengi shekti ball – 20);
- Rezerv (ótinim berýshi negizgi talaptar boıynsha keledi, biraq baldar boıynsha ótpeıdi jáne eger maquldanǵan 800-den bas tartý bolǵan jaǵdaıda, onda rezervtik tizimnen ótinim berýshiler qabyldanady);
- Іrikteýden ótpegender (qatysu.zhilfond.kz portalynda jeke kabınetten bas tartylǵan);

213 páter Kenesary jáne Sembınov kósheleriniń qıylysynda ornalasqan, onyń ishinde:

- 1 bólmeli páterler – 144. Jalpy aýdany: 40,0 - 49,5 m2.
- 2 bólmeli páterler – 69. Jalpy aýdany: 56,7 - 58,7 m2.

Taǵy 587 páter Abylaı han, B. Momyshuly jáne R. Qoshqarbaev dańǵyldarynyń qıylysynda ornalasqan, onyń ishinde:

- 1 bólmeli páter – 378. Jalpy aýdany: 40,0 - 48,8 m2.

- 2 bólmeli páterler– 209. Jalpy aýdany: 55,9 - 57,5 m2 .

Ótinim bergen qatysýshylar arasynda irikteý baldyq júıe boıynsha júrgizildi, páterlerdi bólý ótinish berýshiniń otbasy quramyna jáne jınaǵan baldaryna sáıkes júrgiziledi.

Baǵdarlamanyń barlyq qatysýshysyna «Іrikteýden ótti», «Rezerv» nemese «Bas tartyldy» degen sms-habarlama jiberildi.

Baǵdarlama boıynsha ótkender úshin qonystandyrý ýaqyty men kúni, páterdiń mekenjaıy týraly aqparat qosymsha habarlanady jáne qatysu.zhilfond.kz portalyndaǵy jeke kabınette jarııalanady.