Jastarǵa jalǵa beriletin baspana boıynsha qandaı jaǵdaılarda sharttyń kúshi joıylady
NUR-SULTAN. QazAqparat – Nur-sultan qalasy ákimdigi Turǵyn úı qorynyń baspasóz hatshysy Armanaı Qabdeshova «Jumys isteıtin jastarǵa arnalǵan satyp alý quqyǵynsyz jalǵa beriletin turǵyn úı» baǵdarlamasy boıynsha qandaı jaǵdaılarda sharttyń kúshi joıylatynyn túsindirdi, dep habarlaıdy QazAqparat tilshisi.
«Osy páterdi alǵannan keıin, ony basqalarǵa jalǵa bere almaısyzdar. Kelisimshartta bul talaptar kórsetilgen. Qujatta kelisimshartty merziminen buryn toqtatýǵa quqyq beretin úsh jaǵdaı bar. Birinshisi – atalǵan baspanany úshinshi adamdarǵa jalǵa bergeni úshin», - dedi A. Qabdegova elorda ákimdiginde ótken baspasóz máslıhatynda.
Onyń aıtýynsha, turǵyn úı qoryna monıtorıng júrgizý bólimi bar. Olar jalǵa beriletin turǵyn úılerdi tekseretin bolady. Qyzmetkerler shartty suratyp, otbasy quramyn qaraıdy. Eger páter basqa bireýlerge jalǵa berilse, onda tıisti akt jasalyp, osy tektes kemshilikterdi joıýǵa 5-7 kún beriledi. Osy merzimde talaptar oryndalmasa, sot tártibimen kelisimsharttyń kúshi joıylady.
«Ekinshiden, eshbir sebepsiz 6 aıdan astam ýaqyt jalǵa alý tólemi jasalmasa da shart buzylady. Úshinshiden, jalǵa alýdyń bes jyly ishinde siz jyljymaıtyn múlik alsańyz, ıaǵnı jeke baspanany erterek satyp alýǵa múmkindik bolsa», - dedi ol.
Budan buryn habarlanǵandaı, 2020 jyly elordada jumysshy jastarǵa 350 páter beriledi.
1-6 jeltoqsan aralyǵynda «Jumys isteıtin jastarǵa arnalǵan satyp alý quqyǵynsyz jalǵa beriletin turǵyn úı» baǵdarlamasy boıynsha qujat qabyldanady.
