Jastarǵa teris ádet úıretetin jabaıy jarnamany tııatyn ýaqyt jetti - Q. Ýálı

Depýtattyń aıtýynsha, Dúnıejúzilik densaýlyq saqtaý uıymynyń byltyrǵy málimeti boıynsha, Qazaqstan ishimdik ishýden álemde 8 orynǵa shyǵypty. Al narkologtar sońǵy úsh jylda maskúnemdikke boı urǵan balalardyń sany 10 esege artqanyn aıtady. Mamandardyń sózine qaraǵanda, elimizde spırtti ishimdikke áýestigi orta eseppen 10-15 jasta bastalady eken.

«Balalardyń arasynda maskúnemdik jyldan jylǵa kóbeıip keledi. Bul aşy shyndyq. Osy jaman ádetke ıtermeleıtin, olardyń azǵyndaýyna jol ashatyn birden-bir nárseniń bastysy, bárimizge belgili bále, quıturqy jarnama. Alkogolsiz syra dep kóbigin kópirtip, áserlep, adam qyzyǵatyndaı etip kórsetken úlken qalalardaǵy bılbordtar, telearnalardaǵy shaǵyn jarnamalardan kóziń súrinedi. Al osydan balalardyń ishimdikke degen qumarlyǵy, alǵashqy qadamy alkogolsiz syradan bastaý alaryna shúbá keltire almaımyz. Sol kózdi arbaǵan «alkogolsiz» syranyń dámi naǵyz syramen birdeı, al alkogol mólsheri 0,5 paıyzdy quraıdy eken. Dámine dándegen bala, ary qaraı naǵyz syrany da jıirkenbeı ishýge kirisedi de, sanasynda ishimdiktiń izi óshpesteı oryn alary sózsiz», -dedi depýtat Qurmanǵalı Ýálı.

Sonymen qosa, búgingi kúni ultynyń keleshegin oılaǵan memleketter jaısyz jarnamalarǵa tyıym salyp jatqanyn aıtyp, jarnamanyń kerisinshe salaýatty ómirge shaqyrý turǵysynan jasalýy qajettigin atap ótti.

«Janymyzǵa batatyn jabaıy jarnamany tizgindeıtin ýaqyt jetken sııaqty. San dáýirden uly dalany oıqastaǵan kóshpeli ata-baba urpaqtary, shúkir, órkenıetti zamanǵa jetti, táýelsizdik alǵanymyzǵa 20 jylǵa jaqyndady. Endi kóshpeli tarıhymyzdan syr shertetin, qaladaǵy árbir ilingen bılbord nemese shaǵyn jarnama eń aldymen, tárbıelik máni men maǵynasy bar, kórse kóz toıatyn jarnamany kóbeıtip, beı ádepti, jaman áreketti ýaǵyzdaıtyn, kóshelerimizdiń, dańǵyldarymyzdyń sıqyn qashyratyn, jastardyń sanasyn ýlaıtyn kóz súrinetin jarnamadan qutylý kerek», -dedi ol.