Jastarǵa qatelesýge bolmaıdy degen qaǵıdadan qutylý qajet - Esen Eleýken
"Negizi, biz kóp jaǵdaıda jastarǵa nusqaý berip otyramyz. Olardy da tyńdaý kerek, olarmen birge ómir súrý kerek. Men qazir basqa qyzmetke aýyssam da, 20 jyldaı basy-qasynda júrgennen keıin bir nárseni túsindim. Jastarmen birge júrip, oıyn tyńdasań, nebir keremet dúnıeler bar. Soǵan kóp múmkindik berý kerek sııaqty. Sosyn eksperımentten qoryqpaý qajet. Áıtpese, bizde qatelesýge bolmaıdy degen qatyp qalǵan bir qaǵıda bar. Olaı emes. Qatelesý kerek, úırený kerek. Kóp nárse mańdaıyna tıgennen keıin kóredi ǵoı", - dedi E.Eleýken QazAqparat tilshisine bergen suxbatynda.
Onyń oıynsha, jastardy kóp erkelete berýge de bolmaıdy. Olar ómirdiń qıynshylyǵyn da kórýi tıis. Sol kezde adam bolyp qalyptasady, qoǵamda óz ornyn taba alady.
"Árıne, jastarǵa birinshi kezekte baspana jáne jumys qajet. Jastar jylynda osy máselelerge basymdyq bergen durys shyǵar. Sosyn jastardy kásipke baýlý máselesine kóbirek mán berilse, quba-qup. Al, endi, anaý fleshmobtar, úlken kontsertter jáne basqa sharalar jylda bolyp jatyr ǵoı. Oǵan asa mán bermeı, naqty sharýarlarmen aınalysý qajet. Jalpy, meniń jastarǵa kóńilim tolady. Eń bastysy, olarǵa baǵyt berip, jańaǵy aıtqan máseleler qamtylsa, jaqsy nátıje bolady. Bizde qalaı? Jaqsy bir bastama kóterilse, ony naýqanǵa aınaldyryp jiberedi. Sony naýqanǵa aınaldyrmaı, berilgen tapsyrmalar oryndalyp, sodan naqty nátıje shyqsa, sony qalaımyn", - dep atap kórsetti E.Eleýken.
Aıta keteıik, keshe QR Prezıdenti Nursultan Nazarbaev Jastar jylynyń ashylýyna arnalǵan resmı sharaǵa qatysty. Sol jerde Memleket basshysy birneshe tyń bastamalardy jarııalady. Máselen, aýylǵa baratyn jastardyń járdemaqysyn kóterýdi tapsyrdy. Prezıdenttiń sóılegen sózin myna jerden oqýǵa bolady.
