Jastarǵa energetıkalyq sýsyn satýǵa tyıym salynbaq
Elimizde 21 jasqa deıingi jastarǵa energetıkalyq sýsyndardy satýǵa tyıym salynbaq. Bul týraly Úkimet otyrysynda Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.
«Salamatty ómir salty daǵdylaryn qalyptastyrý boıynsha medıtsınalyq-sanıtarııalyq alǵashqy kómek uıymdarynda 452 salamatty ómir salty kabıneti, 4608 densaýlyq mektebi, temekige qarsy kabınet jáne 157 jastar densaýlyq ortalyǵy jumys isteıdi. Temekini tutynýdy azaıtý úshin 2023 jylǵy 1 qańtardan bastap temeki ónimderine aktsızdiń stavkalary kóterildi. Tutynýdyń elektrondyq júıeleriniń (veıpter), olar úshin hosh ıistendirgishter men suıyqtyqtardyń aınalymyna tolyq tyıym salýdy engizý boıynsha Májiliste Zańǵa ózgerister qarastyryldy. 21 jasqa deıingi adamdarǵa energetıkalyq sýsyndardy satýǵa tyıym salýdy engizý jónindegi normany talqylaý rásimi júrgizilýde», - dedi mınıstr.
Onyń atap ótýinshe, bıyl «Aýyldyq densaýlyq saqtaýdy jańǵyrtý» pılottyq ulttyq jobasy iske asyrylýda. Joba aıasynda 2025 jyldyń sońyna deıin 655 medıtsınalyq-sanıtarııalyq alǵashqy kómek obektisi paıdalanýǵa beriledi.
«32 zamanaýı kópbeıindi aýdandyq ortalyq aýrýhana uıymdastyrylady. Aýyldyq densaýlyq saqtaý úshin 1100 medıtsına qyzmetkeri daıarlanady. Aýyldyq jerlerdegi qoljetimsizdik máselesi sheshiletin bolady. Sonymen qatar, sońǵy jyldary 250 alǵashqy kómek kórsetý obektisi salyndy», - dedi Ajar Ǵınııat.
