Jastarǵa beriletin 5 mln teńgege deıingi nesıeniń talaptary qandaı
Jastardy nesıeleý baǵdarlamasy QR Eńbek jáne halyqty áleýmettik qorǵaý mınıstrliginiń Kásipkerlikti damytý jónindegi 2021-2025 jyldarǵa arnalǵan ulttyq jobasy sheńberinde iske asyrylady.
Agrarlyq nesıe korporatsııasy jastarǵa shaǵyn nesıe berý baǵdarlamasy aıasynda senim bildirilgen ókil-agent retinde qujat qabyldaý, bıznes-jobany baǵalaý, nesıe jáne kepil týraly kelisimderdi daıyndaý, nesıe somasyn qaryz alýshyǵa berý, nesıeniń paıdalanylýyn tekserý, qaryz alýshymen esep aıyrysýdy júrgizý, qaryz alýshydan tólem qabyldaý jáne merzimi ótken bereshekpen jumys jáne ýákiletti organdarǵa esep berý úshin jaýapty.
Shaǵyn nesıe 21 jastan 35 jasqa deıingi jas kásipkerlerdi qoldaýǵa baǵyttalǵan. Ótinish bergen sátte jastardyń kásipker retinde tirkelgen ýaqyty 5 jyldan aspaýy tıis. Baǵdarlamaǵa jumys isteıtin jastar da qatysa alady.
Nesıe somasy - 5 mln teńgege deıin, syıaqy mólsherlemesi – 2,5 paıyz. Nesıe merzimi – mal sharýashylyǵyn damytýǵa arnalsa – 7 jyl, bıznestiń basqa da baǵyttary úshin – 5 jylǵa deıin beriledi.
«Negizi borysh pen syıaqy óteý kezinde shaǵyn nesıe merziminiń úshten birine deıin jeńildik kezeńi qarastyrylǵan. Nesıe kepil múlikpen qamtylýy mindetti. Kepil retinde jyljymaly arnaıy tehnıka jáne jyljymaıtyn múlik qabyldanady. Kepil múlik bolmaǵan jaǵdaıda kepil berýshiler basqa týystary óz kepilderin bere alady», - dedi O. Baımahanov Astana Kommýnıkatsııalar qyzmetinde ótken brıfıngte.
Ótinim qabyldaý 6 naýryzda bastaldy, qujattardy «Agrarlyq nesıe korporatsııasy» AQ fılıaldaryna tapsyrý qajet. Fılıaldardyń negizgi mekenjaılary – agrocredit.kz saıtynda ornalasqan.
Qajetti qujattar tizimi: jeke basyn kýálandyratyn qujat, joba boıynsha bıznes jospar, qyzmet kórsetetin bankten shoty bar ekenin rastaıtyn anyqtamalar, qarjy uıymdarynan nesıe beresheginiń, onyń ishinde merzimi ótken bereshektiń bolýy týraly anyqtamalar, qatysýshynyń/úmitkerdiń jalaqysy nemese ózge de tabystaryn rastaıtyn qujat jáne jınaqtaýshy zeınetaqy qorynan úzindi kóshirme, kepil múlikti baǵalaý týraly esep, kepil berýshi jáne kepilmen qamtamasyz etý jónindegi qujattar.
Bul rette jyljymaıtyn múlikti, onyń ishinde turaqty turǵyn úılerdi satyp alýǵa, jer ýchaskelerin satyp alýǵa, baǵalyq qaǵazdardy satyp alýǵa jáne qarýdy, quramynda esirtki zattary bar taýarlardy, oıyn bıznesin uıymdastyrýdy, QR zańnamasyna qaıshy keletin jáne temeki nemese alkogol ónimderin satyp alýdy kózdeıtin jobalarǵa nesıe berilmeıdi.
Shaǵyn nesıe berý týraly sheshimdi ákimdik janynan qurylǵan komıssııa qabyldaıdy. Oǵan máslıhat depýtattary, memlekettik organdardyń, «Atameken» kásipkerler palatasynyń, kásipkerler, BAQ ókilderi kiredi.
Úmitkerler ózderiniń bıznes josparyn, komıssııa otyrysynda kórsetedi. Komıssııa bıznes josparlardy baǵalap, úzdikterin irikteıdi. Joba ózekti, dáleldi, ekonomıkalyq negizdelgen, áleýmettik mańyzy bar, ómirsheń jáne onyń naqty is-qımyl jospary bolýy tıis.
Osylaısha, bıyl elordada 562 jas kásipkerge 2,8 mlrd teńge bóli qarastyrylyp otyr.
