Jastarǵa arnalǵan jańa memlekettik syılyq paıda bolady

ASTANA. QazAqparat – «Dala daýysy» ulttyq syılyǵynyń qorytyndysy jeltoqsan aıynda shyǵarylady. Bul týraly Mádenıet jáne sport vıtse-mınıstri Nurǵısa Dáýeshov málim etti, dep habarlaıdy QazAqparat tilshisi.

«Sondaı-aq jazýshylar men dramatýrgterge beriletin «Aıboz» syılyǵy bar. Qazirgi tańda oǵan irikteý júrip jatyr. Al kompozıtorlardy qoldaý maqsatymen «Dala daýysy» jobasy qolǵa alyndy. Ol baıqaý jeltoqsan aıynda máresine jetedi. Munda da opera janrynda, halyq aspaptarynda tyń týyndylar jazyp júrgen sazgerler marapattalady. «Respýblıka áni» atty estradalyq ánder júldesi taǵaıyndalǵan. Osy syılyqtar arqyly biz ónerdiń árbir salasyn qamtýdy kózdedik. Aýqymy úlken bolǵandyqtan «Umai», «Aıboz», «Dala daýysy» sııaqty birneshe taqyrypqa bólip otyrmyz», - dedi mınıstrdiń orynbasary.

Onyń aıtýynsha, keler jyly mádenıet salasyndaǵy jastardy qoldaýǵa arnalǵan jańa syılyq taǵaıyndalmaq.

«Kelesi jyly Prezıdent Qasym-Jomart Kemelulynyń tapsyrmasymen Jastardyń memlekettik syılyǵy taǵaıyndalady. Ol 2023 jyldan bastap beriledi», - dedi Nurǵısa Dáýeshov.