Jastarǵa arnalǵan jalǵa beriletin baspana boıynsha shart merzimin uzartýǵa bola ma
NUR-SULTAN. QazAqparat – Nur-sultan qalasy ákimdigi Turǵyn úı qorynyń baspasóz hatshysy Armanaı Qabdeshova «Jumys isteıtin jastarǵa arnalǵan satyp alý quqyǵynsyz jalǵa beriletin turǵyn úı» baǵdarlamasy boıynsha ball esepteý tártibin túsindirdi, dep habarlaıdy QazAqparat tilshisi.
«Baǵdarlamaǵa qatysty barlyq suraqtar boıynsha 109 qyzmetine (I-Komek) habarlasa alasyzdar. Jastardyń ótinimderin qarastyrý múmkindigine qaraı, biz olarǵa tıisti statýsty qoıamyz. Osy oraıda úsh statýs bolady. Birinshisi - qujatty qarastyrýǵa qabyldanǵany, ekinshisi – durystaý qajet bolsa, túzetýge jiberý, úshinshisi - baǵdarlama sharttaryna sáıkes kelmeseńiz, qujattardy qarastyrý toqtatylady», - dedi A. Qabdeshova.
Onyń sózine qaraǵanda, baǵdarlama aıasynda kelisimshart merzimi uzartylmaıdy.
«Jalǵa beriletin baspana 5 jyl merzimge uzartý quqyǵynsyz beriledi. Baspananyń bul túri jeke páter alýǵa aqsha men bastapqy jarnany jınaý úshin usynylady. Óıtkeni aı saıynǵy jalǵa alý tólemi óte tómen, ıaǵnı úıdiń sharshy metr aýmaǵyna qaraı 5 myńnan15 myń teńgege deıin. Bes jyldan kelisimsharttyń kúshi joıylady», - dedi baspasóz hatshysy.
Armanaı Qabdeshovanyń aıtýynsha, atalǵan baǵdarlama boıynsha irikteý baldyq júıe boıynsha júrgiziledi.
Belgili bolǵandaı:
- Otbasynyń bolǵany úshin - 5 ball, nekeniń ár jyly úshin - 2 ball;
- Bala bolǵany úshin-1 ball, kelesi árbir bala úshin – 2 ball;
- Bıýdjettik uıymdardaǵy (memlekettik mekemeler men memlekettik kásiporyndardaǵy) eńbek qyzmeti úshin – 5 ball, eńbek ótiliniń ár jyly úshin -1 ball;
- naryq suranysyna ıe 100 mamandyq tizimine sáıkes mamandyqty ıgergen ótinish berýshige - 10 ball (tizim saıtta jarııalanǵan zhilfond.kz);
- jeke kásipkerlik qyzmetti júzege asyrý kezinde keminde 1 jyl – 5 ball, árbir jyl úshin – 1 ball;
- ótinish berýshiniń ártúrli qyzmet salalarynda jeke jetistikteri bolǵan kezde (kásibı saladaǵy jetistikteri eskeriledi) – 2 ball;
- ekinshi deńgeıdegi bankterdegi jınaq shottaryndaǵy jınaqtardyń árbir jyly úshin - 2 ball.
Budan buryn habarlanǵandaı, 2020 jyly elordada 350 páter beriledi.
