Jastarǵa arnalǵan qyzmet kórsetý ortalyǵy: Astanalyq jastardy ne mazalaıdy
Ortalyqqa elordalyq jastar ózderin tolǵandyrǵan túrli másele, suraqtar boıynsha júgine alady. Osy oraıda QazAqparat tilshisi ortalyqtyń jumysymen tanysyp, astanalyq jastardy ne mazalaıtynyn bilip keldi.
«Bıyl 1 maýsymda elordada alǵash ret jastarǵa arnalǵan qyzmet kórsetý ortalyǵy ashyldy. Maqsat – jastardy mazalaǵan suraqtarǵa jaýap bere otyryp, keńes, usynys berý. Bul ortalyqqa jastar túrli máselelermen kelip júgine alady. Onyń qatarynda kásiptik baǵdar kórsetý, jumysqa ornalasý, jastarǵa arnalǵan baǵdarlamalarǵa qatysý, volonterlik qyzmet, bos ýaqyttaryn tıimdi qoldaný jáne taǵy basqa. Odan bólek, jastardy jıi mazalaıtyn basty suraqtyń biri turǵyn úı máselesi. Ortalyq mamandary osy atalǵan baǵdarlar boıynsha keńes bere alady», - dedi Nur-Sultan qalasy ákimdigi «Astana jastary» ortalyǵy basshysynyń orynbasary Aıan Ermentaev.
Ortalyq qyzmetti jastarǵa tegin kórsetedi. Jáne búginge deıin 700-ge deıin astanalyq jas óz suraqtaryna jaýap alǵan.
«Ortalyqta birneshe sala boıynsha mamandar qyzmet kórsetip jatyr. Sonyń ishinde eń ózektisi jumysqa ornalasý men baspanaly bolý máselesi. Ortalyqty halyq jıi shoǵyrlanatyn jerde ashýdy jón kórdik. ıAǵnı kez kelgen jas adam ótip-ketip bara jatyryp, óz suraǵyna jaýap ala alady. Qysqasha aıtqanda, bul jer jastarǵa arnalǵan barlyq múmkindikterdiń jıyntyq ortalyǵy», - deıdi ol.
Ortalyq aptanyń bes kúni (dúısenbi-juma) jumys isteıdi. Tańerteńgi saǵat 9-dan keshki saǵat 18:00-ge deıin. Saǵat 13:00-den – 14:00-ke deıin túski úzilis.
Mamandardyń aıtýynsha, jastar ortalyqqa óz suraǵymen ǵana emes usynys, ıdeıasymen de kele alady.
«Óz ıdeıasy bar nemese kásip ashqysy kelgen jastar ortalyqqa kelip óz oıymen bólise alady. Sátti ıdeıa avtorlaryna naqty qoldaý kórsetiledi. Odan bólek, biz volonterler ázirleımiz jáne volonterlikpen aınalsamyz ıaǵnı volonter bolamyn degen nıetti jastarǵa esigimiz ashyq», - dedi A. Ermentaev.
«Men bıyl zańger mamandyǵy boıynsha kolledjdi támamdadym. Búgin ortalyqqa mamandyǵym boıynsha bos jumys ornyn izdep keldim. Óz mamandyǵym boıynsha jumys istegim keledi. Ortalyq mamandary jumys oryndary boıynsha keńes berdi, bos oryndar bar eken. Oqýdy endi bitirgen jas mamandar úshin kerek ortalyq dep oılaımyn. Elordada jastarǵa arnalǵan qyzmet kórsetý ortalyǵynyń jumysy týraly áleýmettik jeliden bildim», - deıdi elordanyń jas turǵyny Raýshan Shemirova.
