Jastarǵa arnalǵan baǵdarlamalar: bilim, baspana jáne kásipkerlik
ASTANA. KAZINFORM — Qazaqstanda jastardyń bilim alýyna, jumysqa ornalasýyna, baspanaly bolýyna, kásip bastaýyna, shyǵarmashylyqpen aınalysýyna jáne qoǵamdyq ómirge belsendi aralasýyna jan-jaqty qoldaý kórsetiledi.
Jastardyń qabiletin shyńdap, óz múmkindigin júzege asyrýyna qajetti jaǵdaı jasaýǵa aıryqsha mán beriledi.
Osy baǵytta elimizde bilim berý jáne turǵyn úı baǵdarlamalary jetildirilip, jastardy jumyspen qamtý jáne kásipkerlik bastamalaryn qoldaý sharalary júzege asyrylady. NEET sanatyndaǵy azamattardy áleýmettik ortaǵa beıimdeý boıynsha da júıeli jumys júrgizilip keledi.
Sonymen birge jastardyń shyǵarmashylyq áleýetin arttyrý men kreatıvti ındýstrııalardy damytýǵa basymdyq berilgen. Búginde barlyq óńirde kreatıvti ortalyqtar jumys isteıdi. Bul alańdar jas avtorlar men shyǵarmashylyq sala ókilderiniń jobalaryn damytýyna, kásibı baılanys ornatýyna jáne jańa bastamalaryn iske asyrýyna múmkindik beredi.
Jastar saıasatynyń mańyzdy baǵyttarynyń biri – jas azamattardy qoǵamdyq jáne memlekettik úderisterge belsendi tartý. Osy maqsatta olardyń ókildigin arttyrý, Prezıdenttik jastar kadr rezervin qalyptastyrý jáne volonterlik qozǵalysty damytý jumystary júrgizilip jatyr.
Belsendi ári bastamashyl jastarǵa da qoldaý kórsetiledi. Bul baǵytta «Daryn» memlekettik jastar syılyǵy men «Táýelsizdik urpaqtary» granty shyǵarmashylyq, áleýmettik jáne kásipkerlik jobalardy damytýǵa jol ashady.
Aıta ketelik elde 14–35 jas aralyǵyndaǵy 6 mln 192 myńǵa jýyq jas bar.
