Jastarǵa arnalǵan arendalyq baspana: Elordada ótinishterdi qabyldaý bastalady

NUR-SULTAN. QazAqparat - Bıyl Jastar jyly aıasynda elordada jumysshy jastarǵa 1050 arendalyq baspana berý josparlanyp otyr. Bul týraly máslıhat otyrysynda Nur-Sultan qalalyq Qoǵamdyq damý isteri basqarmasynyń basshysy Talǵat Rahmanberdi málim etti, dep habarlaıdy QazAqparat.

«Memleket basshysy bıylǵy Joldaýynda áleýmettik saıasattyń basym baǵyty qoljetimdi baspanamen qamtamasyz etý ekendigin aıtty. Aǵymdaǵy jyldyń qarasha aıynda jumysshy jastarǵa arnalǵan jaldamaly 1050 páterge ótinishterdi qabyldaýdy bastaımyz. Ótinishter Smart Astana platformasy arqyly júzege asyrylady», - dedi ol.

Buǵan qosa, basqarma basshysy jastardy qoldaý baǵytynda júrgizilip jatqan sharalarǵa toqtaldy.

«Bıznestiń jol kartasy 2020» baǵdarlamasy sheńberinde jas kásipkerlerge granttar beriledi. Bıyl 63 jas kásipker grantqa ıe boldy», - dep qosty Rahmanberdi.

Qala ákimdiginiń aqparatyna sáıkes, áleýmettik az qamtylǵan otbasylardyń balalaryn qoldaýǵa da basa nazar aýdarylady. Máselen, bıyl turmysy tómen otbasylarda tárbıelenetin 165 bala grantqa ıe boldy. Onyń 140-y aqparattyq-kommýnıkatsııalyq tehnologııalar, ınjenerlik, aýylsharýashylyǵy jáne bıoresýrstar mamandyqtaryn tańdaǵan. Qalǵan 25-i pedagogıkalyq mamandyqtar boıynsha bilim ala bastady.

Sonymen birge, áleýmettik az qamtylǵan otbasyǵa jatatyn 49 túlek Nur-Sultan qalasy ákiminiń arnaıy grantyna ıe boldy. Olardyń arasynda jetimder, balalar úıiniń túlekteri, múgedek jáne ata-ananyń qamqorlyǵynsyz qalǵan, kópbalaly otbasylardyń balalary bar.