Jastarǵa «9-20-25» jańa baǵdarlamasy ázirlenip jatyr
«Otbasy banki» jastarǵa arnalǵan «9-20-25» jańa baǵdarlamasyn ázirlep jatyr. Bul týraly Mádenıet jáne aqparat mınıstri Aıda Balaeva aıtty, dep habarlaıdy Kazinform.
«Daryndy jastardy memlekettik turǵyda qoldaý maqsatynda «Daryn» memlekettik jastar syılyǵy jyl saıyn berilip keledi. Zańǵa sáıkes, úmitkerlerdiń jasy 35 jasqa deıin ulǵaıtyldy. Marapattaý nomınatsııalaryna ózgerister engizildi. Ózderiniń naqty maqsattaryna jáne qoǵamnyń ıgiligine baǵyttalǵan jastardy tárbıeleý maqsatynda «Qoǵamdyq qyzmet» nomınatsııasy «Kreatıvti bastamalar» nomınatsııasymen aýystyryldy. Bul rette Memleket basshysy belgilegen «Táýelsizdik urpaqtary» granty aıasynda bıznes, ǵylym, mádenıet, BAQ jáne aqparattyq tehnologııalar salasyndaǵy 30 úzdik joba anyqtaldy. Qazirgi ýaqytta «Otbasy bankimen» birlesip, «9-20-25» jańa baǵdarlamasy ázirlenýde, onyń negizgi qatysýshylary jastar bolmaq», - dedi mınıstr Ortalyq kommýnıkatsııalar qyzmetindegi brıfıngte.
Mınıstrdiń aıtýynsha, bıyl «Memlekettik jastar saıasaty týraly» zańǵa tujyrymdamalyq túzetýler engizildi. Bul zańnyń basty jańalyqtarynyń biri – jastardyń jasyn 35 jasqa deıin ulǵaıtý. Osylaısha, jastardyń sany 3,7 mıllıon adamnan 5,7 mıllıon adamǵa deıin artty.
«2023 jyly Jastardyń damý ındeksi engizildi. Bul kórsetkish memlekettik organdardyń jastarmen jumysynyń jáne olardyń máselelerin sheshýdiń tıimdiligin baǵalaýǵa múmkindik beredi. Sondaı-aq, 2023-2029 jyldarǵa arnalǵan memlekettik jastar saıasatynyń tujyrymdamasy bekitildi. Onda aýyl jastarymen jumystan bastap patrıottyq tárbıege deıingi 7 baǵyty qamtıdy. Odan basqa qujatta 80 is-sharalar jospary qabyldandy. Tujyrymdamanyń alǵashqy nátıjeleri bar. 943 myń adam jumyspen qamtylsa, onyń 467 myńy – jastar», - dedi Aıda Balaeva.
