Jastardyń jumyspen qamtylýyna erekshe nazar aýdarý qajet – Asqar Mamın

NUR-SULTAN. QazAqparat - Qazaqstanda aldaǵy 5 jyldyq kezeńde eńbek naryǵyn keshendi damytý boıynsha usynystar ázirlenedi. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Bizdiń basty mindetimiz – nátıjeli jumysmen qamtýdy kúsheıtý esebinen azamattardyń ál-aýqatyn arttyrý. 2017-2019 jyldar aralyǵynda tıimdi iske asyrylǵan »Eńbek« baǵdarlamasy arqasynda jaqsy nátıjelerge qol jetkizdik. Sonyń ishinde 1,3 mln adam jumysqa ornalasty. 51 myń adam óz bıznesin ashty. 248 myń adam biliktiligin arttyrdy. 53 myń jas azamat alǵashqy kásipterin ıgerýde. Sonymen qatar qabyldanǵan sharalardyń tıimdiligin arttyrý úshin kelesi tapsyrmalar bar», - dep atap ótti ol.

Úkimet basshysynyń aıtýynsha, eńbek naryǵy qurylymynyń ózgerýine baılanysty onyń osy ózgeristerge ıkemdiligi joǵary bolýy qajet. «Birinshiden, osyǵan baılanysty Eńbek, Bilim, Ulttyq ekonomıka mınıstrlikteri salalyq mınıstrliktermen, ákimdiktermen birlesip, osy jyldyń sońyna deıin aldaǵy 5 jyldyq kezeńde eńbek naryǵyn keshendi damytý boıynsha usynystardy ázirlesin. Ekinshiden, qysqa merzimde oqytý kepildi jumysqa ornalastyrý negizinde júzege asyrylýy tıis. Shaǵyn nesıe jáne grant berý kezindegi talaptardyń oryndalýyn naqty baqylaý qajet», - dedi Asqar Mamın.

Premer-Mınıstr úshinshiden, jastardyń áleýetin damytý maqsatynda «Jas kásipker», «Jas maman» jobalary iske asyrylyp jatqanyn aıtty.

«Jastardyń jumyspen qamtylýyna erekshe nazar aýdarý qajet. Osy baǵytta jumysty jalǵastyramyz. Jalpy, turaqty jumys oryndaryn qurý ákimder men salalyq mınıstrlikter jumysynyń negizgi basymdyǵy bolyp qala beredi. bul kórsetkishter barlyq memlekettik baǵdarlamalarda, ınvestıtsııalyq jobalar men áleýmettik-jekeshelik seriktestik jobalarynda kórsetilýi tıis», - dedi Úkimet basshysy.