Jastardyń zamanaýı áleýmettik-saıası ustanymdary qandaı
ASTANA. QazAqparat - Astanadaǵy L.N.Gýmılev atyndaǵy Eýrazııa ulttyq ýnıversıtetinde «Jastar jáne dáýir kelbeti» atty respýblıkalyq jastar forýmy ótti, dep habarlaıdy QazAqparat.
Forým barysynda Astana qalasynyń 20 jyldyǵy men Elbasy N.Á.Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty halyqqa Joldaýy aıasynda talqylaýlar júrgizildi. Sharaǵa Almaty, Atyraý, Aqtóbe, Pavlodar, Oral, Ońtústik Qazaqstan, Shyǵys Qazaqstan, Aqmola oblystarynan delegattar qatysty.
Jıyndy L.N.Gýmılev atyndaǵy Eýrazııa ulttyq ýnıversıtetiniń Áleýmettik-mádenı damý jónindegi prorektory, QR UǴA akademıgi Dıhan Qamzabekuly kirispe sózben ashyp, forýmnyń maqsattary men mindetterine toqtaldy. Onyń ishinde stýdent-jastardyń otansúıgishtik sezimin damytý, elimizdiń egemendik tarıhyn keńinen nasıhattaý; jastardyń zamanaýı áleýmettik-saıası ustanymdaryn qalyptastyrý; stýdent-jastarǵa Qazaqstan qoǵamynyń bolashaǵy úshin jaýapkershilikterin túsindirý sekildi mańyzdy máseleler bar.
Búgingi basqosý pikir almasýdyń ashyq alańyna aınaldy dese de bolǵandaı. QR Din isteri jáne azamatyq qoǵam vıtse-mınıstri Abzal Núkenov «Rýhanı jańǵyrý» jáne memlekttik jastar saıasaty» taqyrybyndaǵy baıandamasynda ózekti máseleler qamtyldy. Aýdıtorııamen tikeleı baılanys ornatqan vıtse-mınıstr Táýelsizdik taǵylymy, básekege qabilettilik, demografııa, aýyl sharýashylyǵyna erekshe kóńil bólý jaıy men memlekettik baǵdarlamalardyń mán-mańyzy týraly keńinen áńgimelep berdi.
Al «Astana arlandary» klýbynyń bas menedjeri, Olımpıada chempıony Baqtııar Artaev salamatty ómirdiń el aldyndaǵy jaýapkershiligine toqtalsa, Astana qalasy Jastar saıasaty ortalyǵynyń basshysy Baqytjan Júnisbekov «Astana - jastar qalasy» ekenin naqty dálel-dáıektermen aıtyp berdi.
Sondaı-aq «Qasıetti Qazaqstan» ǵylymı-zertteý ortalyǵy dırektorynyń orynbasary Batyrhan Jumabaev «Jastarǵa kıeli oryndar arqyly tálim berý», «QazAqparat» HAA Bas dırektorynyń keńesshisi Qanat Toqabaev «BAQ jáne jastar», «Qazaqstan KVN Odaǵy» respýblıkalyq jastar qoǵamdyq birlestiginiń prezıdenti Esen Eleýken «Jastar talǵamy jáne shyǵarmashylyq izdenister» taqyrybynda syndarly sóz qozǵady. Al jıynǵa qatysýshy jastar kókeıdegi saýaldaryn qoıyp, oǵan naqty jaýap alýmen qatar, óz oılaryn da ortaǵa salyp úlgerdi.
