Jastardyń ulttyq qundylyqtardy ulyqtaýy mańyzdy - Nurlan Serǵalıev
Onyń aıtýynsha, 29 sáýirde ótkeli otyrǵan Qazaqstan halqy Assambleıasynyń HHVІІ sessııasyna Batys Qazaqstan oblysynan jeti delegat qatysady.
Assambleıa sessııasynyń ózi 1 mamyr - Qazaqstan halqynyń birligi kúni qarsańynda ótýiniń ózi óz mıssııasyn aıqyndap turǵandaı.
Qazaqstannyń táýelsizdik jyldarynda jetken tabys-jetistiginiń barshasy turaqtylyq pen beıbitshiliktiń arqasynda bolsa, onyń negizi Elbasy aıqyndap bergen etnıkaaralyq kelisim men birlikten bastaý alady. Búgingi kúni Qazaqstanda álemde teńdessiz sanalatyn tatýlyq pen birliktiń, kópetnıkalyq qoǵam tatýlyǵynyń biregeı úlgisi qalyptasqany barshaǵa aıan. Al mundaı úlginiń qazaq elinde saltanat qurýyna, sondaı-aq qoǵamda turaqtylyqtyń saqtalýyna Qazaqstan halqy Assambleıasy ınstıtýtynyń qosqan úlesi zor.
Ýnıversıtet basshysynyń paıymdaýynsha, Assambleıa mindetterin aıqyndaıtyn máselelerdi júzege asyrýda joǵary oqý oryndarynyń róli joǵary. Tatýlyq pen birlik, ózara kelisim, turaqtylyq pen toleranttylyq sekildi uǵymdardy qundylyq retinde jastarǵa uǵyndyrý basty nazarda bolýy shart.
Qoǵamdyq kelisim men jalpyulttyq tutastyq ıdeıasyn alǵa aparý baǵytynda BQMÝ-daǵy Qazaqstan halqy Assambleıasy kafedrasy men «Rýhanı jańǵyrý» ınstıtýty tıisti jumystardy atqaryp keledi. Bul rette elimizdiń mádenıetimen, bilimimen, salt-dástúrlerimen tanystyrý sharalary shet elderdegi (mysaly, Polsha, Latvııa, Reseı) áriptes oqý oryndarynda da turaqty óris alýda.
Taǵy bir aıta ketetin mańyzdy másele, búgingi tańda barsha qazaqstandyqtardyń, ózge ulys ókilderiniń memlekettik tildi meńgerýge degen umtylysy jyl saıyn ósip keledi.
Elge, ultqa jáne tilge degen qurmetti arttyrýda Alǵys aıtý kúni tyń serpin berdi dep aıtýǵa bolady. Aıtalyq, osynaý mereke aıasynda «Qazaq eli - uly dostyq mekeni» taqyrybynda «Dostyq» stýdenttik klýby músheleri men ýnıversıtette bilim alyp jatqan ózge etnos ókilderi arasynda qazaqtyń tanymal aqyndarynyń óleńderin mánerlep oqý baıqaýy ótti.
Baıqaýdyń maqsaty Elbasy N.Á. Nazarbaevtyń «Bolashaqqa baǵdar: rýhanı jańǵyrý», «Uly dalanyń jeti qyry» atty baǵdarlamalyq maqalalary negizinde jáne «Týǵan jer» jobasy aıasynda halqymyzdyń rýhanı qundylyqtaryn nasıhattaý edi.
Saıysta 16 úmitker baq synap, olardyń arasynda orys, ózbek, túrkimen, nemis, sheshen, ýkraın halqynyń ókilderi boldy. Qatysýshy jastar uly Abaıdyń, Mahambettiń, Sultanmahmut Toraıǵyrovtyń, Muqaǵalı Maqataevtyń, Tólegen Aıbergenovtiń, Juban Moldaǵalıevtiń, Ábdildá Tájibaevtyń, Qadyr Myrza Álıdiń óleńderin naqyshyna keltirip oqyp, qazaq aqyndaryna degen shynaıy qurmeti men súıispenshilikterin aıqyn sezdire bildi.
Mine, muny jastardy halqymyzdyń rýhanı baılyqtarynan sýsyndatýdyń bir jarqyn mysaly deýge bolady.
Stýdent jastar arasynda ozyq salt-dástúrlerdi dáripteý maqsatynda aılyq sharalar da ótip turady. Qazaqstannyń ár óńirinde qyz uzatý, kelin túsirý sııaqty salt-joralǵylarynyń ózinde ózgeshelikter bar ekeni belgili. Ýnıversıtetimizde «Serpin» baǵdarlamasy aıasynda ońtústik aımaqtan kelip, bilim alyp jatqan jastar da bar. Bul baıqaýdyń ereksheligi, ár óńirdiń salt-dástúri jóninde sahnalyq kórinister qoıýmen shektelmeıdi. Ár óńirdiń tarıhynan syr shertilip, salt-dástúrleri tanystyrylyp, taǵam túrleri usynylady.
Osylaısha mıdaı aralasqan stýdentter bir-birine jaqynyraq bola túsedi. Ózge ulys ókilderi de qazaq halqynyń rýhanı jan-dúnıesin tanı túsedi.
«Qoryta aıtqanda, jastardy jalpyulttyq ıdeıaǵa uıystyrýdyń, memlekettik jáne basqa tilderdi meńgerýine barynsha jaǵdaı jasaýdyń mańyzy zor. Yntymaq pen birlikti tý etken elimizdiń alar asýlary da mol bolary anyq», - dep túıindedi oıyn Nurlan Serǵalıev.
Foto: news.wksu.kz
