Jastardyń tabysty bolýy úshin olarǵa qajetti barlyq jaǵdaıdy qazir jasaý kerek - Elshi

ASTANA. QazAqparat - Jastardyń tabysty bolýy úshin olarǵa qajetti barlyq jaǵdaıdy qazir jasaý kerek. Bul týraly QR Prezıdentiniń bıylǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna qatysty pikir bildirgen Argentınanyń Rosarıo qalasyndaǵy qazaqstandyq mádenı ortalyqtyń dırektory, Qazaqstan halqy Assambleıasynyń Álem Elshisi Irına Vagner aıtty.

«Meniń oıymsha, árbir azamattyń ózin memlekettegi jalpy ilgerileýdiń quramdas bóligi retinde sezinýi Elbasy Joldaýynyń óte mańyzdy psıhologııalyq sáti bolyp tabylady. Memlekettiń turǵyndardyń jeke ál-aýqatyna alańdaýshylyq bildiretini árqaısymyzdyń boıymyzda qaıtarym sezimin oıatatyny sózsiz. Prezıdenttiń basqarý úlgisin ajyratyp kórsetip otyrǵan naqty josparlanǵan áreketter qazaqstandyqtardyń boıynda búgingi turaqsyz álemde tynyshtyq pen qorǵalý sezimin uıalatady. Qoǵamdyq sanany jańǵyrtý protsesiniń aıasynda maǵan eń mańyzdy bolyp kóringen birneshe tarmaqty atap kórsetkim keledi. Olar: mektepaldy bilim berý sapasyn kóterý, pedagogtardyń jumys jaǵdaıy men mártebesin ósirý, joǵary bilim sapasyn qadaǵalaý»,-deıdi Elshi.

Sondaı-aq ol jastar eldiń bolashaǵy ekenin aıtady. Al olardyń tabysty bolýy úshin barlyq qolaıly jaǵdaıdy qazir jasaý kerek. Mysaly, qazirgi kezde Argentına astanasy Býenos-Aıreste jastar arasyndaǵy halyqaralyq Olımpıada oıyndary tabysty ótip jatyr. Oǵan 57 qazaqstandyq atlet qatysýda.

«Sondaı-aq Elbasynyń 2019 jyldy «Jastar jyly» dep jarııalaý usynysyn erekshe qoldaıtynymdy aıtqym keledi»,-deıdi Irına Vagner.