Jastardyń sapaly bilim alýyna barlyq jaǵdaı jasalýda - Tımýr Ysqaqov
KÓKShETAÝ. QazAqparat - Aqmola oblysynda jastardyń sapaly bilim alýyna barlyq jaǵdaı jasalýda. Bul týraly QazAqparat tilshisine bergen suhbatynda oblystyq jastar saıasaty məseleleri basqarmasynyń basshysy Tımýr Ysqaqov aıtty.
Basqarma basshysynyń sózine qaraǵanda, búgingi tańda oblysta memlekettik jastar saıasatynyń basym baǵyttaryn iske asyrýǵa, jastardy qoldaýǵa jəne jan-jaqty damýyna baǵyttalǵan júıeli jumystar júrgizilýde. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy men «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty bıylǵy Joldaýynda jańa zaman talaptaryna beıimdelý men jetistikterge jetýdiń joldary qarastyrylǵan. Memlekettik saıasattyń basty baǵyttarynyń biri - halyqtyń ár deńgeıi úshin bilimniń qoljetimdiligi jáne bilim alý múmkindikterimen qamtamasyz etý. Osy oraıda, óńirde oblys ákiminiń ataýly shákirtaqysyn taǵaıyndaý boıynsha jumystar júrgizilýde.
«Búgingi tańda oblys ákiminiń shákirtaqysy esebinen 276 aqmolalyq stýdent elimizdiń joǵary oqý oryndarynda bilim alyp júr. Osy maqsatta oblystyq bıýdjetten 102 mıllıon teńge qarjy bólingen», - deıdi Tımýr Ysqaqov.
Aıta ketý kerek, oblys ákiminiń ataýly shákirtaqysynyń ıegerleri óńirdegi jáne respýblıka aýmaǵyndaǵy joǵary oqý oryndarynda bilim alady. Búgingi tańda Aqmola oblysynda 4 joǵary oqý orny bar. Onda 50 mamandyq boıynsha stýdentter bilim alýda. Olardyń arasynda Shoqan Ýálıhanov atyndaǵy Kókshetaý memlekettik ýnıversıtetinde jalpy medıtsınalyq fakýltettiń ashylýy mańyzdy bolyp otyr. Endi jergilikti stýdentter eshqaıda barmaı-aq, osynda bilim alýyna bolady.
Oblys ákiminiń ataýly shákirtaqysy sapaly bilim alyp, keıin jumysqa ornalasý baǵytynda áleýmettik jaǵynan az qamtylǵan toptaǵy stýdent jastar úshin úlken materıaldyq kómek. Máselen, 2017 jyly jetim, múmkindigi shekteýli, kópbalaly jáne tolyq emes otbasylardan shyqqan 49 stýdent ataýly shákirtaqyǵa ıe bolǵan. Oǵan qosa, bul joba jastardy suranys joǵary mamandyqtarǵa tartý arqyly Aqmola oblysynda kadr tapshylyǵyn sheshýge baǵyttalǵan. Ataýly shákirtaqy sheńberinde 120 stýdent medıtsınalyq, pedagogıkalyq, teologııalyq, tehnıkalyq, agrarlyq tárizdi mamandyqtar boıynsha bilim alýda. Bul stýdentter dıplom alǵan soń kelisimshart negizinde oblys aýmaǵynda 3 jyl jumys isteýi tıis. Aǵymdaǵy jyly osyndaı 7 maman jumysqa ornalasty. Bıylǵy jyly joǵary medıtsınalyq bilimnen keıin oqýyn jalǵastyryp, kardıolog, rentgenolog, onkolog, allergolog sııaqty mamandyqtar boıynsha bilim alyp jatqan stýdentterge de ataýly shákirtaqy taǵaıyndaý josparda bar.
«Ataýly shákirtaqydan basqa Aqmola oblysynda joǵary bilim alatyn stýdentterge 2017 jyldan bastap bilim berý granttary taǵaıyndalyp keledi. Bıyl oblystyq bıýdjetten 150 grant bólinse, onyń 50-i birinshi ret medıtsınalyq fakýltetke, 100-i pedagogıkalyq mamandyqtar boıynsha oqıtyn stýdentterge. Osylaısha, bilim berý júıesin jetildirý, jas mamandardyń bilim alýyna jaǵdaı jasaý arqyly biz olardyń kásibı sheberlik deńgeıin kóteremiz jáne halyqtyń ál-aýqatyn jaqsarta alamyz», - dep tolyqtyrdy Tımýr Ysqaqov.
