Jastardyń sábı súıýine kómektesetin senim telefony iske qosyldy

NUR-SULTAN. QazAqparat – Qazaqstanda «Jastar arasynda reprodýktıvti densaýlyqty saqtaý máseleleri boıynsha konsýltatsııalyq qyzmet kórsetý» jobasy iske qosyldy, dep habarlaıdy QazAqparat tilshisi.

Jańa áleýmettik jobany QR Aqparat jáne qoǵamdyq damý mınıstrliginiń qoldaýymen «Qazaqstannyń jynystyq jáne reprodýktıvtik densaýlyq jónindegi qaýymdastyǵy» júzege asyrýda.

Joba aıasynda jastar arasynda sábı súıý úshin densaýlyǵyn saqtaý, otbasyn josparlaý ádisteri, erte júktiliktiń aldyn alý jáne eskertý, jynystyq jolmen beriletin ınfektsııalyq aýrýlardyń aldyn alý boıynsha konsýltatsııalyq, aqparattyq-túsindirý jumystary júrip jatyr.

Bilikti psıhologtar men medıtsına qyzmetkerleri 8 8000 040 540 senim telefony arqyly keńes bere alady.

Eger kontratseptsııalyq ádister, jynystyq jolmen beriletin juqpaly aýrýlar men AITV aldyn alý, ana sútimen bala emizýdiń mańyzy, bosanýdan keıingi qalypqa kelý jáne reprodýktıvti densaýlyq boıynsha basqa da suraqtaryńyz bolsa, kún saıyn saǵat 8:00-den 20:00-ge deıin joǵaryda atalǵan nómirge habarlasýǵa bolady.

Qalalyq jáne QR basqa da mobıldi telefondarynan qońyraý shalý tegin.