Jastardyń reprodýktıvti densaýlyǵyn nyǵaıtý qajet - vıtse-mınıstr

ASTANA. QazAqparat - Búgin Densaýlyq saqtaý mınıstrliginde Prezıdent Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy talqylandy. Otyrysta mınıstrliktiń 2018 jyly basymdyq berilýi tıis baǵyttary ataldy, dep habarlaıdy «QazAqparat» HAA tilshisi.

Іs-sharaǵa QR Densaýlyq saqtaý mınıstri Eljan Birtanov,  Qoǵamdyq keńestiń músheleri, óńirlerdiń densaýlyq saqtaý basqarmalarynyń, aýmaqtyq departamentteriniń basshylary qatysty.

Densaýlyq saqtaý vıtse-mınıstri Lázzat Aqtaeva otyrysta baıandama jasap, halyqaralyq tájirıbeniń negizinde respýblıkada Qoǵamdyq densaýlyq saqtaý qyzmeti qurylǵanyn atap ótti. Onyń aıtýynsha, qyzmettiń jumysy ómirdiń barlyq kezeńine: sábılerdi vaktsınatsııalaý men mektep medıtsınasy, salaýatty minez-qulyq, ekologııalyq qaýipsizdik jáne jastar men eresekterdiń arasyndaǵy eńbek gıgıenasynan bastap, durys tamaqtaný men egde jastaǵy adamdardyń sozylmaly degeneratsııalyq aýrýlarynyń aldyn alýǵa deıin baǵyttalǵan.

Memleket basshysy óz Joldaýynda durys tamaqtanýdy, sportpen shuǵyldanýdy, dene belsendiligin qosa alǵanda qoǵamdyq densaýlyqty basqarýdy kúsheıtý kerektigin atap ótken bolatyn.

«Jastardyń reprodýktıvti densaýlyǵyn saqtaý men nyǵaıtýǵa erekshe nazar aýdarǵan jón. Mundaı jaǵdaıda árbir nysanaly top úshin jeke tásildi aıqyndaý, sondaı-aq dene shynyqtyrýmen shuǵyldaný úshin ınfraqurylym qurý, qaýipsiz ómir men eńbek úshin jaǵdaı jasaý jáne jastardyń reprodýktıvti densaýlyǵyn nyǵaıtý qajet», - dedi Lázzat Aqtaeva.

Prezıdent sonymen birge Joldaýynda úzdik halyqaralyq tájirıbeniń negizinde obyrdy erte dıagnostıkalaý men emdeý qamtamasyz etilýi tıistigin atap kórsetken bolatyn. 

«Osyǵan baılanysty, biz erte dıagnostıkalaý men emdeýdi, ásirese qaterli isikterdiń profılaktıkasynan bastap emdeýdi jetildirýge deıingi is-sharalardy qamtýdy kózdeıtin onkologııalyq aýrýlarmen kúres jónindegi keshendi jospardy ázirleý kerekpiz. Al oǵan múmkindik beretin onkologııaǵa jańa ári joǵary tıimdi tehnologııalardy ákelýge tıispiz»,- dedi vıtse-mınıstr.

Lázzat Aqtaeva aldaǵy ýaqytta MÁMS paketi jetildiriletinin jetkizdi.

«Qazirgi tańda álemde, onyń ishinde densaýlyq saqtaýda  ınnovatsııalyq tehnologııalar tez damýda. Zamanaýı tehnologııalar halyqqa medıtsınalyq qyzmet kórsetý úlgilerin ózgertedi. Barlyq ózgeristerge biz der kezinde nazar aýdarýǵa tıispiz. Munyń barlyǵy birinshi kezekte zańnamalyq aktilerde kórsetilýi kerek. Soǵan baılanysty,  densaýlyq saqtaý júıesiniń tıimdiligin arttyrýǵa baǵyttalǵan sharalardy iske asyrý úshin Memleket basshysy óziniń Joldaýynda Úkimetke «Halyq densaýlyǵy jáne densaýlyq saqtaý júıesi týraly» Kodekstiń jańa redaktsııasyn ázirleýdi tapsyrdy», - dedi Lázzat Aqtaeva.