Jastardyń ómiri bizden jaqsy bolaryna úlken senimdemin - Nursultan Nazarbaev
ASTANA. QazAqparat - Qazaqstan Prezıdenti Nursultan Nazarbaev shyǵarmashylyq zııaly qaýym ókilderimen kezdesý barysynda ǵylymnyń damyǵan búgingi zamanynda jastardyń bolashaǵy jarqyn bolaryna úlken senimde ekendigin atap ótti, dep habarlaıdy QazAqparat.
«El maǵan tapsyrylǵannan keıin árıne de, men bolshaqty, qazaǵymyzdyń ne bolatynyn oılaımyn. Birinshiden, eki úlken ımperııanyń ortasynda turmyz. Ońtústikte - musylman elderi, shyǵystaǵy kórshilerimiz bar, sol uly eldegi jáne soltústiktegi memlekettiń túbinde saıasaty qandaı bolady?! Biz tóńirektegi barlyq eldermen tatýlyqtyń, ishki tatýlyqtyń arqasynda ǵana jetistikke jetip otyrmyz. Ony istemegen adamdardy ózderińiz kórip otyrsyzdar, aıtpaı-aq qoıaıyn. Іshinde búlikten-búlik, tóńkeristen-tóńkeris bolyp jatqan el ońbaıdy. Bizdiń bolashaqqa jeter jolymyz - bul birlik», - dep atap ótti Elbasy.
Nursultan Nazarbaev sondaı-aq júzge, rýǵa bólinbeý máselesin tilge tıek etti. «Bir adamnyń balasy ekenimizdi, bir el, bir qazaq ekenimizdi túsiný kerek», - dedi ol.
Zııaly qaýymmen áńgime barysynda Memleket basshysy sonymen qatar, kún saıyn jańalyqtar legi aǵylyp otyrǵan qazirgi ınnovatsııalyq jaǵdaıda eldiń kóshke ilesý máselesin aıtyp ótti.
«Mysalǵa, densaýlyq saqtaý salasynda jyl saıyn 10-15 protsentke ózgeris bolady. Bizdiń býynǵa soǵan ilesýdiń ózi ońaı emes. Al jastardyń ilesýi qalaı bolady? Túbinde qazirgi mamandyqtardyń jartysy kereksiz bolyp qalady. Mashına qurastyrýda robottar jumys isteıdi, úıdiń ishinde de robottar bolady, tamaq isteıtin, úı sypyratyn robottar bolady. Úı salatyn 3D prınter-robottar keledi. Sonda qyrýar maman jumyssyz qalady. Qazir jeńil mashına júrgizýshisiz basqarylady. Banktardyń da keregi bolmaı qalady, ınternet-saýda damıdy. Sony oılaýymyz kerek. Ol bizge óte tez jetedi. Sol úshin, saýatty adamnyń saýatsyz adamǵa qaraǵanda basqa mamandyqtarǵa aýysyp ketýine múmkindigi joǵary bolady. Jastarymyzǵa osyny túsindirsek eken. Ońaı bolmas, biraq olardyń ómiri bizden jaqsy bolatynyna úlken senimdemin. Biraq bolashaqty oılaǵan kezde elimizdiń, halqymyzdyń, tarıhymyzdyń, tilimizdiń saqtalyp qalýy mańyzdy. Al solardyń eń basynda turǵany - qazaqtyń aýyz birligi. Qaıtkende de osyny saqtap qalýymyz kerek», - dep túıdi oıyn Elbasy.
